La confederaziun vul prender a mauns las ulteriuras planisaziuns per
via e rodaglia tenor il princip d'ina politica da traffic durabla. In
med per cuntanscher quai èn ils plans sectorals tenor l'art. 13 da la
lescha federala davart la planisaziun dal territori. Perquai han ils
uffizis federals da vias (UVIAS) e da traffic (UFT) ensemen cun l'uffizi
federal da svilup dal territori (UFST) elavurà las parts da concept dals
plans sectorals rodaglia/traffic public e via ed introducì ina vasta
procedura d'audienza e da cooperaziun.
Il traffic sin via ed il traffic sin rodaglias crescha fermamain
dapi onns. Prognosas partan dal fatg ch'il traffic da persunas en Svizra
pudess s'augmentar durant ils proxims 20 onns enfin 48 pertschient ed il
traffic da rauba schizunt enfin 95 pertschient. A basa da quest augment
da traffic daventan ils problems da capacitad pli critics, en spezial
per il traffic da traversada da las Alps sco er en las aglomeraziuns.
Politica da traffic durabla
En il senn d'ina politica da traffic durabla vali da reglar il
traffic en furma economica, raschunaivla ord vista sociala e favuraivla
a l'ambient. Per cuntanscher quai è basegnaivla ina coordinaziun tranter
ils singuls purtaders da traffic sco er tranter ils projects pli gronds.
Per garantir ina coordianziun optimala èn vegnids elavurads ils plans
sectorals rodaglia/traffic public e via. Quests plans sectorals èn
instruments d'administraziun, da planisaziun e d'infurmaziun da la
confederaziun per la planisaziun cumplessiva e la coordinaziun dal
traffic public sco er dal sectur dal traffic sin via. Plans sectorals
garanteschan che novas mesiras e novs projects vegnan evaluads e
decidids tenor criteris transparents e che prioritads per la realisaziun
ord vista generala vegnan determinadas. Els sustegnan la coordinaziun
cun ulteriuras planisaziuns e pussibiliteschan en pli l'armonisaziun
tranter la confederaziun ed ils chantuns (plan directiv chantunal). Il
vair instrument da coordinaziun sur tut ils secturs ora è il plan
directiv chantunal (p. ex. l'armonisaziun tranter il svilup d'abitadi ed
il traffic).
Projects impurtants èn en planisaziun
Insaquants projects da traffic sin via e rodaglias èn en planisaziun
ed en realisaziun. Projects gronds ch'ins po numnar en connex cun ils
plans sectorals rodaglia/traffic public èn la viafier 2000, la NEAT sco
er las colliaziuns da la Svizra orientala e da la Svizra franzosa a la
rait da viafier europeica da gronda sveltezza. En il sectur traffic sin
via èn al center la finiziun da la rait da vias naziunalas, il
mantegniment da la substanza e la garanzia d'ina funcziunalitad
optimala. En quest connex vegnan l'iniziativa Avanti e la cuntraproposta
dal cussegl federal a giugar ina rolla impurtanta. Ultra da quai vai per
la definiziun d'ina nova rait da vias federala che duai remplazzar il
sistem actual da vias naziunalas e da vias principalas svizras.
Audienza e cooperaziun
L'audienza da las autoritads sco er l'infurmaziun e la cooperaziun
da la populaziun davart ils plans sectorals rodaglia/traffic public e
via vegnan realisadas en il chantun Grischun durant il spazi da temp
dals 28 da november enfin ils 20 da december 2002. L'exposiziun publica
succeda tant en las regiuns sco er tar l'uffizi chantunal da planisaziun
a Cuira. Posiziuns ed opposiziuns ston ins inoltrar enfin ils 31 da
december 2002 a l'uffizi chantunal da planisaziun.
Gremi: departament da l'intern e da l'economia publica
Funtauna: rg uffizi da planisaziun