Durant l'onn idrologic 2000/2001 è vegnì duvrà 1.775 GWh (ura da gigawat) electricitad en il Grischun. Quai signifitgescha en cumparegliaziun cun la perioda da l'onn precedent ina diminuaziun da var 3.7 pertschient.
Las ovras electricas dal Grischun annunzian annualmain a l'uffizi d'energia lur consum da forza electrica. La statistica elavurada da l'uffizi d'energia mussa ch'il consum en il Grischun è sa reducì in zichel durant l'ultima perioda 2000/2001 (october 2000 fin settember 2001) e quai per l'emprima giada dapi 1996/1997.
Sin il sectur dals tegnairchasa, dal mastergn, da l'agricultura e dals servetschs importa il consum damain circa 4.3 pertschient. Ils motivs per quai èn probablamain cunzunt da chattar en il fatg che la perioda da l'onn precedent 1999/2000 è stada ina perioda cun in aut consum d'energia (1.843 GWh). L'onn da record 1999/2000 è stà marcà da mancanza da naiv en il sid da las Alps e da temperaturas vaira bassas. La davosa perioda tschiffada è stada marcada da blera naiv e d'ina aura detg miaivla, quai che ha gì consequenzas per il consum d'energia.
Sin il sectur da las viafiers ha chaschunà l'interrupziun dal manaschi sin il traject da Cuira-Arosa e la reducziun da la spertadad en il tunnel dal Vereina ina sminuaziun dal consum d'energia. Tut en tut ha quel impurtà per tut las viafiers (VR, VFF, VFA) circa 3.4 pertschient.
Sulettamain en l'industria gronda è creschì levamain il consum per 0.4 pertschient en consequenza da la buna situaziun economica.

Gremi: uffizi d'energia dal Grischun
Funtauna: rg uffizi d'energia dal Grischun