Dacurt è la pagina web dal chantun Grischun vegnida repassada
cumplettamain ed installada danovamain. La purschida d'infurmaziun sin
www.gr.ch è vegnida amplifitgada cuntinuadamain ils ultims onns. Quest
svilup è dentant succedì sin donn e cust da la survesaivladad e da la
structura da la pagina web. Ins ha stuì far in "redesign" cun las
suandantas premissas: meglra navigaziun, structuraziun pli survesaivla
dals cuntegns e la pagina d'entrada che vegn actualisada automaticamain
(novitads). A chaschun da las "lavurs da renovaziun" han ins desistì
sapientivamain d'animaziuns e da maletgs che dovran bler temp per
chargiar.
Contribuziuns culturalas
La regenza metta a disposiziun credits da 23'800 francs per las
suandantas ovras culturalas resp. per ils suandants projects culturals:
-
acquisiziun da sis ovras d'art da Flurin Bischoff, Marc Bundi,
Menga Dolf, Patricia Jegher e Stefan Rüesch e
-
producziun d'ina copia da film da 35 mm dal film documentar
"Camenisch - Mit dem Kopf durch die Wand" da Daniel von Aarburg.
Tgira d'uffants cumplementara a la famiglia va en consultaziun
La regenza preschenta il sboz per ina lescha davart la promoziun da
la tgira d'uffants cumplementara a la famiglia en il chantun Grischun.
Il sboz cuntegna la basa legala per la finanziaziun da la purschida che
correspunda al basegn da plazzas da tgira cumplementara a la famiglia.
Ils documents per la consultaziun pon ins retrair dal departament da
giustia, polizia e sanitad (DGPS). Il termin per inoltrar la
consultaziun scada da mez avrigl 2002. La basa legala per relaschar las
cundiziuns per furmar l'instrucziun da scola en bloc e per promover
models da scolas dal di vegn elavurada dal departament d'educaziun e
preschentada a la regenza in mument pli tard.
Consultaziuns per la confederaziun
En sia posiziun pertutgant il svilup da la politica agrara da la
confederaziun sustegna la regenza en generalmain la posiziun ch'ils
princips da l'economia dal martgà liber duain er vegnir resguardads
rinforzadamain en la politica agrara. Ella fa dentant er valair
resalvas. Tranter auter vegn refusada cleramain in'ulteriura sminuaziun
dal sustegniment dal martgà sco er in liom pli stretg dals pajaments
directs vi da la forza da lavur standardisada. Parallelmain cun
l'optimaziun da las mesiras duain vegnir concepidas las cundiziuns da
pajament per ils onns 2004 - 2007 per l'agricultura uschia, ch'il
process d'adattaziun da las structuras duai succeder uschè
raschunaivlamain sco be pussaivel ord vista sociala.
Plinavant s'exprima la regenza en connex cun il nov urden da
finanzas da la confederaziun. En il center da la proposta stat
l'aboliziun da la limitaziun temporara per incassar la taglia federala
directa e la taglia sin la plivalur. Domaduas taglias importan radund 60
pertschient da las entradas fiscalas da la confederaziun. La regenza
sustegna la cuntinuaziun intenziunada da l'urden da finanzas vertent
senza limitaziun temporara da las taglias numnadas. Na acceptabla è
dentant la renunzia da la tariffa reducida da la taglia sin la plivalur
per las prestaziuns da loschament. Il consentiment al nov urden da
finanzas succeda pia cun la resalva che la tariffa speziala per il
turissem duai vegnir mantegnida. Quella è per il chantun Grischun
d'impurtanza centrala.
Ord las vischnancas
Il project per la realisaziun d'ina arcada per pedunsas e peduns en
il Welschdörfli a Cuira vegn approvà. Uschia duai l'arcada existenta sin
l'areal da l'Hotel Chur vegnir prolungada vers sid. Il chantun
garantescha ina contribuziun da maximal 75% vi dals custs calculads da
quasi 300'000 francs.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun