La regenza suttametta al cussegl grond in messadi concernent l'extensiun architectonica da la scola da dunnas dad oz. Per reunir las bibliotecas existentas en il seminari da magisters ed en la scola da dunnas ad ina medioteca per la scol'auta professiunala da pedagogia (SAP) duai vegnir construì in edifizi nov en il Kantengut a Cuira che duai esser pront per il diever probablamain a l'entschatta da l'onn da scola 2003/2004.
Durant l'onn da scola 2002/2003 vegnan a far diever trais scolas dals edifizis da la scola da dunnas dad oz en il Kantengut (partiziuns dal seminari da la scola da dunnas, partiziuns che n'han betg da far cun il seminari da la scola da dunnas sco er il seminari da magisters), entant che durant l'onn da scola 2003/04 ed en la fasa transitoria fin 2006 vegnan quai schizunt ad esser quatter scolas (partiziuns dal seminari da la scola da dunnas, il seminari da magisters, la scol'auta professiunala da pedagogia sco er il center da furmaziun sanadad e fatgs socials ch'è planisà).
Las bibliotecas d'enfin uss dal seminari da magisters e da la scola da dunnas han restrenschì la purschida concernent ses cuntegn ed il spazi sin l'instrucziun da basa. Perencunter vegn la medioteca da la scol'auta professiunala da pedagogia er a stuair satisfar als basegns d'ina furmaziun supplementara sistematica. Per meglierar las relaziuns nunsuffizientas da localitads propona la regenza al parlament da metter la medioteca en in edifizi nov (construcziun leva en lain cun platta da palantschieu en betun) en il Kantengut a Cuira. Previs è in edifizi annex cun dus plauns che duai esser collià en il vest cun l'edifizi principal da la scola da dunnas (parallel a la halla da gimnastica). Ins quinta cun custs da 1.8 milliuns francs. Resalvà resta in credit d'obligaziun correspundent dal cussegl grond ch'è suttamess al referendum da finanzas facultativ.
La realisaziun da la medioteca ch'è urgentamain necessaria per la SAP sin l'areal dal Kantengut a Cuira è ina contribuziun decisiva vi d'ina structuraziun orientada vers il futur da la SAP. Il project da construcziun è accordà als basegns da medioteca da la scol'auta professiunala da pedagogia ed è economicamain la soluziun la pli cunvegnenta, perquai ch'el pussibilitescha opziuns d'utilisaziun en vista a futurs svilups.
Novaziuns tar la furmaziun da spezialists da gastronomia
Dapi 1996 instruescha e furma la scola professiunala d'hotellaria e gastronomia dal Grischun (SHG) emprendists a spezialists d'hotellaria e gastronomia. A basa da las experientschas dals davos onns daventan necessarias differentas midadas en il reglament d'instrucziun existent. Ellas cumpiglian ils sequents giavischs centrals:
- Las prestaziuns dals dus praticums duain furmar ina part dals examens finals da l'emprendissadi.
- En differents roms vegn augmentà il temp d'examen u vegn per part transferì en auters roms.
- Il rom "Tegnairchasa da cuminanza" vegn midà en "economia da chasa"
- En il rom "Economia da chasa" vegn integrà da nov ina part pratica en ils examens finals d'emprendissadi.
Tras questas novaziuns pon ils emprendists da la SHG vegnir examinads tenor criteris da giudicat confurmas al temp ed orientadas tenor la pratica. La regenza approva l'ordinaziun davart la furmaziun e l'instrucziun professiunala, ils praticums e l'examen final da l'emprendissadi dals spezialists d'hotellaria e da gastronomia sco er la revisiun totala da las finamiras d'instrucziun correspundenta e l'urari.
Consultaziun a la confederaziun
Visavi la confederaziun s'exprima la regenza en senn positiv concernent la revisiun parziala da l'ordinaziun davart las vias naziunalas. Perquai che las tariffas da contribuziun per il mantegniment èn vegnidas adattadas l'ultima giada l'entschatta da l'onn 2000, sa tracti qua be anc da fixar da nov las tariffas da contribuziun per il manaschi da las vias naziunalas. Quai succeda a basa dals indicaturs "grevezza, interess e forza finanziala". Las calculaziuns actualas chaschunan per il Grischun in augment da la tariffa da subvenziun da fin uss 85 pertschient ad 88 pertschient. Quest augment per trais pertschient vegn probablamain a distgargiar il quint da las vias annualmain per circa 450'000 francs. La regenza beneventa expressivamain er la reglamentaziun dals centers per la controlla dal traffic cun camiuns pesants. Ils chantuns duain d'ina vart retschaiver contribuziuns da la confederaziun vi da lur custs chaschunads da la polizia e da l'autra vart er vi da l'infrastructura necessaria.
Da las vischnancas
Il project per renovaziuns ed edifizis d'extensiun en il sectur plurivalent da la scola d'Ardez vegn approvà da princip. Vi dals custs d'investiziun imputabels da 480'000 francs vegnan messas en vista contribuziuns chantunalas da 17.5 pertschient.
Chanzlia chantunala dal Grischun
Gremi: regenza
Funtauna: rg chanzlia chantunala dal Grischun