La regenza accepta in project d'intervenziun che sa drizza cunter la violenza a chasa (violenza envers dunnas en la lètg ed en il partenadi). En cooperaziun cun instituziuns statalas e privatas vulan ins provocar ina midada, e quai cun la finamira da pudair intervegnir effectivamain en cas da violenza a chasa, da pudair proteger las victimas e far responsabels ils culpabels.

Tenor in studi dal fondo naziunal vegn maltractada d'in partenari en Svizra mintga tschintgavla dunna durant sia vita; passa 40 pertschient da las dunnas pateschan sut la violenza psichica. Ils custs che vegnan chaschunads annualmain tras la violenza envers las dunnas vegnan stimads sin 400 milliuns francs. En il Grischun na datti naginas retschertgas spezialas. Ins parta dentant dal fatg che las cifras menziunadas possian vegnir transferidas analogamain sin il chantun.
Il post da stab per dumondas d'egualitad (biro d'egualitad dal Grischun) ha elavurà in concept per ina futur organisaziun cunter la violenza a chasa. En quel concept vegnan proponidas las sequentas mesiras:
- Crear in project d'intervenziun cunter la violenza tenor l'exempel d'auters chantuns (spezialmain BL, BS, ZH, SG e BE).
- Convocar ina maisa radunda cun ina moderaziun externa. La maisa radunda sa cumpona da quellas autoritads ch'èn confruntadas cun la violenza cunter las dunnas.
- Numnar in post da coordinaziun/ina direcziun dal project ch'iniziescha e piglia part a la maisa radunda. Quest post maina e coordinescha il project, procura per l'administraziun e per la lavur da publicitad ed organisescha la furmaziun supplementara per las instituziuns participadas.
Il project d'intervenziun vegn limità l'emprim sin trais onns (2003 fin 2005). La direcziun dal project ed il secretariat vegnan integrads en il post da stab per dumondas d'egualitad. Suenter la fin da la fasa da pilot duai vegnir decidì da nov. Il biro d'egualitad vegn ad entschaiver cun las lavurs preliminaras mez 2002. I vegn fatg quint cun custs da 218'000 francs per ils trais onns. Al cussegl grond vegn proponì in credit impegnativ per il preventiv 2003.

9.6 milliuns per projects forestals integrals
Ils guauds en il chantun Grischun adempleschan differentas funcziuns, betg il davos er quellas da proteger abitadis, vias da traffic sco er implants artisanals e purils d'infrastructura cunter bovas, crudada da crappa e lavinas. Blers guauds da protecziun sa chattan en in stadi nunsatisfacent. En il rom d'uschenumnads projects integrals vegnan prendidas las mesiras necessarias per ch'ils guauds possian ademplir las funcziuns pretendidas a moda persistenta. La regenza approva ils trais projects integrals sequents: Tumleastga exteriura (Veulden, Pasqual, Roten, Giuvaulta, Sched, Tumegl e Trans), Val Stussavgia (Stussavgia e Tenna) e Trin. I vegnan empermessas contribuziuns chantunalas d'in import total da 9.6 milliuns.
La regenza approva il plan per il svilup dal guaud dal Grischun central che daventa uschia impegnativ per las autoritads chantunalas e communalas.

Contribuziuns culturalas
I vegnan pajadas contribuziuns e garanzias da deficit d'ina summa totala da 272'000 francs a las suandantas ovras ed occurrenzas culturalas:
- film "L'ultimo respiro" da Riccardo Lurati, Roveredo,
- film "Amaz(z)ing Cam" da Curdin Schneider, Seglias,
- film "Würfelwelt" da José Federspiel, Domat,
- festa da films a Malans dals 24/25 da matg 2002,
- projects "LiquidCom" ed "Ospiti" da l'artist figurativ Peter Trachsel, Küblis,
- exposiziun d'ovras dad Alois Carigiet (1902-1985) en il Giapun a chaschun da ses 100avel anniversari,
- exposiziun "Forever. Die Tätowierung - Eine Ausstellung, die unter die Haut geht" dals 15 da zercladur fin ils 22 da settember 2002 en la Chasa melna a Flem,
- differentas producziuns da la gruppa professiunala da teater In Situ durant l'onn 2002,
- gieu al liber "La fuschella" l'avust/settember 2002 a Scuol,
- ediziun dal cudesch "Flurin Spescha (1958-2000) - Sprache und Stimme" (titel da lavur) a chaschun dal segund di da sia mort l'october 2002,
- ediziun da "Nies Tschespet 2002" ("La tschendra dil temps" da Rico Tambornino) tras la Romania,
- ediziun dal cudesch "Sur da tgamins e spazzatgamins ella Cadi" da Mathias Deflorin,
- ediziun dal disc cumpact "Luaga, was dr Mond so macht" da Linard Bardill,
- ediziun dal catalog (Squitschs da 1994 fin 2001) da Georg Tannò, Cuira,
- concerts da la musica da chombra Musicuria dals 8/9 da zercladur 2002 ad Andeer ed a Cuira,
- concerts dal chor viril Surses dals 31 da mars/6 d'avrigl 2002 a Savognin ed a Riom,
- concerts dal chor da chombra d'Engiadina dals 30-11/1.-12-2002 a Puntraschigna ed a Cuira,
- concerts "Ein Abend mit Jean-Philippe Rameau" (cun Gloria Vanoli e.a.) dals 5 fin ils 7 d'avrigl 2002 a Flem, Cuira e Malans,
- concerts dal club da jazz da Cuira durant l'emprim semester 2002,
- concerts d'orgel a Cuira durant l'onn 2002,
- emnas da curs da musica ed occurrenzas a la "Waldbühne Hubelsee" dal circul cultural d'Arosa durant la stad 2002,
- occurrenzas en il center da cultura "La Vouta" a Lavin dal favrer fin il zercladur 2002, e
- novavels dis da las culturas alpinas a Tusaun, dals 2 fin ils 9 da zercladur 2002.
Chanzlia chantunala dal Grischun

Gremi: regenza
Funtauna: rg chanzlia chantunala dal Grischun