La furmaziun a la scol'auta pedagogica (SAP) entschaiva ad obtegnair furma: A partir da 2003 vegnan offeridas las furmaziuns fundamentalas per persunas d'instrucziun per la scola primara e per la scolina. La regenza ha fixà las cundiziuns structuralas essenzialas per il studi a la scol'auta pedagogica (SAP). Ella accentuescha en quest connex la gronda muntada da la furmaziun pratica.
En ils dus andaments da studi offerids dura il studi cumplet mintgamai trais onns; el vegn dividì en in studi fundamental d'in onn ed en in studi principal da dus onns cun in accent da studi en il terz onn. Il studi fundamental serva a l'introducziun en il champ professiunal ed a l'examinaziun definitiva da la qualificaziun per la professiun, il studi principal a la furmaziun professiunala per propi en il curs tschernì da la furmaziun.
Ils onns da studi entschaivan mintgamai a la fin d'avust e vegnan dividids en mintgamai dus semesters da 20 emnas. In'excepziun fa l'emprim semester che dura dudesch emnas e ch'entschaiva suenter las vacanzas d'atun. Uschia vegn dada la pussaivladad sa sa preparar individualmain per il studi.
Cun 28 emnas pretenda la pratica professiunala ina part essenziala dal temp da furmaziun. Per cumparegliaziun: en la scolaziun da fin uss per las scolastas e per ils scolasts primars al seminari da scolasts duran ils praticums be indesch emnas. Cun la nova regulaziun mussa la SAP cleramain ch'ella realisescha la finamira da furmar cun orientaziun vers la professiun e la pratica.

Ulteriuras infurmaziuns: www.pfh.gr.ch
Quai è la communicaziun da medias nr. 1 da 4 pertutgant il studi a la SAP

Gremi: Departament d'educaziun dal Grischun
Funtauna: rg Departament d'educaziun dal Grischun