La creaziun d'ina basa legala per conderscher contribuziuns a projects che promovan e sustegnan l'integraziun d'estras e d'esters, la reglamentaziun da la collavuraziun cun la polizia chantunala sco er l'indemnisaziun dals custs da la dretgira districtuala Plessur en connex cun las mesiras repressivas en il dretg d'esters, stattan en il center da la revisiun parziala da l'ordinaziun executiva dal cussegl grond tar la legislaziun federala davart ils esters ed ils fatgs d'asil (OECGtLEA). La regenza avra la procedura da consultaziun.

Sco consequenza da l'introducziun da l'emissiun electronica da las permissiuns tras la polizia d'esters dal chantun Grischun sco er dal decret da las mesiras repressivas en il dretg d'esters ha il cussegl grond abrogà 1996 las disposiziuns executivas chantunalas tar la lescha federala davart la dimora ed il domicil en il rom d'ina revisiun totala ed ha relaschà la nova ordinaziun executiva tar la legislaziun federala davart ils esters ed ils fatgs d'asil (OECGtLEA).
Las regulaziuns introducidas cun la nova ordinaziun sin il sectur da la polizia d'esters sco er las mesiras repressivas en il dretg d'esters èn essenzialmain sa cumprovadas. Tuttina s'impona ina revisiun parziala da l'ordinaziun dal cussegl grond. Cun quella duai vegnir creada spezialmain ina basa legala per conderscher contribuziuns a projects che promovan e sustegnan l'integraziun d'estras e d'esters en il chantun Grischun. Ultra da quai èsi da crear cun la revisiun ina basa legala per l'indemnisaziun dals custs da la dretgira districtuala Plessur per la lavur sco instanza chantunala da meds legals sin il sectur da las mesiras repressivas en il dretg d'esters. Plinavant duain vegnir integradas en il rom da la revisiun disposiziuns en l'ordinaziun che repartan da nov la cumpetenza da chastiar cuntravenziuns cunter l'art. 23 al. 6 da la lescha federala davart la dimora ed il domicil dals esters (LDDE; CS 142.20). Finalmain vegnan fatgas anc diversas adattaziuns e correcturas da spezia redacziunala. La consultaziun dura fin ils 24 da matg 2002.

Admissiun da studentas e students senza maturitad gimnasiala a la scol'auta professiunala da pedagogia dal Grischun (SAP)
La regenza relascha l'ordinaziun davart il curs preparatori per l'admissiun al studi a la SAP (ordinaziun davart il curs preparatori) ed approva il medem mument il plan d'instrucziun dal curs preparatori. Tant l'ordinaziun sco er il curs preparatori resguardan spezialmain la furmaziun preliminara individuala da las candidatas e dals candidats. Els tegnan quint ultra da quai da las problematicas en connex cun la segunda lingua chantunala sin il champ da la furmaziun professiunala e dattan la paisa necessaria al champ artistic.

Consultaziuns a la confederaziun
La regenza beneventa da princip la midada da la lescha federala davart la protecziun da plantas novas. Las midadas duain permetter da ratifitgar la convenziun internaziunala davart la protecziun da plantas novas en la formulaziun da 1991 e da far in'adattaziun a la legislaziun da la UE. En sia posiziun al departament federal da l'economia publica beneventa la regenza la menziun expressiva dal privilegi per ils purs. Tenor l'avis da la regenza stuess quel vegnir garantì a moda cumplessiva en la legislaziun actuala, e quai uschia ch'ils dretgs dal possessur da la protecziun da las spezias vegnissan restrenschids mo sin la producziun professiunala e sin il commerzi professiunal da semenza.

Votaziun dals 2 da zercladur
Dumengia, ils 2 da zercladur vegni votà davart ils sequents projects federals: -
midada dals 23 da mars 2001 dal cudesch penal svizzer (interrupziun da la gravidanza) -
iniziativa dal pievel dals 19 da november 1991 "per mamma ed uffant - per la protecziun da l'uffant betg naschì e per l'agid a sia mamma en basegn".
Davart projects chantunals na vegni betg votà.

Fusiun d'uffizis da stadi civil -
Ils uffizis da stadi civil da Fläsch, Jenins, Malans e Maiavilla fusiuneschan sut il num "uffizi da stadi civil dal circul da Maiavilla" ad in sulet uffizi da stadi civil cun sedia a Maiavilla. -
Sut il num "uffizi da stadi civil Lumnezia" cun sedia a Suraua vegnan unids ad in sulet uffizi da stadi civil ils sequents uffizis da stadi civil: Cumbel, Degen, Duvin, Lumbrein, Murissen, St. Martin, Suraua, Surcuolm, Val S. Pieder, Vella, Vignogn e Vrin.
- Ils uffizis da stadi civil Claustra, Cunter e.P., Fideris, Furna, Jenaz, Küblis, Luzein, Saas e St. Antönien fusiuneschan sut il num "uffizi da stadi civil Castels" ad in sulet uffizi da stadi civil cun sedia a Küblis.
- Ils uffizis da stadi civil Alvaschagn, Casti, Mon, Mut, Stierva e Vaz fusiuneschan sut il num "uffizi da stadi civil dal circul d'Alvaschagn" ad in sulet uffizi da stadi civil cun sedia a Lai.

La scola Löwenberg sa cumprova
La regenza beneventa in nov concept per la scola Löwenberg. Ella empermetta ina garanzia da deficit per l'onn 2002 e per ils onns suandants en l'autezza da 170'000 francs. La scola Löwenberg sa chatta en las localitads dal center transitori Surselva a Schluein. Ella serva per preparar ils uffants a la scolarisaziun en las classas regularas da las scolas publicas e garantescha er la promoziun scolastica dals uffants dals requirents d'asil che ston puspè returnar en lur pajais d'origin. La scola interna è ina purschida impurtanta per il center transitori e per l'organisaziun d'asil da l'uffizi dal servetsch social per promover, scolar ed integrar ils uffants en il mintgadi. La furma da promoziun è sa cumprovada ils davos onns ed è vegnida sviluppada en collavuraziun cun il departament d'educaziun, cultura e protecziun da l'ambient.

Da las vischnancas
A la vischnanca da Claustra vegn empermess in credit senza tschains da la confederaziun sco agid d'investiziun en la summa dad 1,4 milliuns francs per realisar il bogn da divertiment. Supplementarmain vegn il project sustegnì cun in import da 292'000 francs che stat sut il titel: contribuziuns d'investiziun ad infrastructuras turisticas ed autras.
Al project per l'amplificaziun dal provediment d'aua 1. etappa (tschiffada da la funtauna Albibella) da la vischnanca da Küblis vegn empermessa ina contribuziun da bunamain 21 pertschient als custs imputabels da 236'000 francs, e quai applitgond la lescha chantunala da megliuraziun.
La segunda etappa da construcziun dal rempar Val Zuondra ed Ovel Schlattain sin il territori da la vischnanca da Schlarigna vegn approvada gist uschè sco il project per il rempar dal Fatschazertobel tranter las vischnancas da Molinis e St. Peter.
La revisiun parziala da la planisaziun locala da la vischnanca da Claustra-Serneus sco er la revisiun parziala da la planisaziun locala da la vischnanca da Samedan vegnan approvadas.
La revisiun parziala da la constituziun communala da Churwalden vegn approvada. Ina revisiun parziala da la lescha da taglia da la vischnanca da Laax vegn medemamain approvada. Approvà vegn er il decret da la lescha davart la taxa per promover il turissem dal circul da Tavau.

Projects da vias
Per differents projects da construcziun da vias en il chantun vegnan dads libers credits d'in import total da stgars 3.5 milliuns (lavurs d'impressari sin la via d'Avras da la punt Lehnen fin Underplatta, lavurs da cuvrida sin la via d'Engiadina Martina - Mingér, lavurs d'impressari sin la via da Pagig tumbin da l'ual fin entifer il vitg da Pagig)

Persunal
La fin d'avrigl van ils sequents emploiads chantunals en pensiun:
- Hans Gruber, Valchava, capovier tar l'uffizi da construcziun bassa,
- Florian Lütscher, Cuira, manader da partiziun tar l'uffizi per il traffic sin via,
- Nicola Luzzi, Lai, inschigner forestal regiunal tar l'uffizi forestal,
- Enrico Toscano, Mesauc, manual tar l'uffizi da construcziun bassa e
- Gertrud Wolf, Cuira, gidantra da chasa en l'ospital da dunnas Fontana.
La regenza als engrazia per ils servetschs ch'els han prestà per il chantun.

- Wiesendanger Rita, naschida 1952, da Winterthur e Dinhard, domiciliada ad Igis, daventa directura da l'uffizi per la furmaziun professiunala e la cussegliaziun professiunala. Ella cumenza sia plazza l'entschatta da november.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun