Otg artistas ed artists dal Grischun survegnan quest onn mintgamai 20'000 francs dal chantun Grischun. En il rom da la concurrenza per "promover la lavur culturala professiunala" èn surtut vegnidas appreziadas lur lavurs inoltradas. Questa concurrenza è vegnida realisada per la tschintgavla giada.

En tut èn vegnidas inoltradas 43 dumondas cun lavurs ord las pli differentas spartas da l'art a la cumissiun da concurrenza. La finamira da la concurrenza è la surdada da stipendis e da contribuziuns per realisar ovras per qua tras cunzunt pussibilitar a las artistas giuvnas ed als artists giuvens in tschert temp da sa deditgar intensivamain a l'activitad artistica.

La qualitad e la professiunalitad èn stadas decisivas
Sut l'egida da l'uffizi da cultura èn las lavurs inoltradas cunzunt vegnidas examinadas minuziusamain concernent lur qualitad e professiunalitad.
In sustegn en il rom da la concurrenza "promover la lavur culturala professiunala" 2002 survegnan:

Corinne Rusch
L'artista grischuna Corinne Rusch lavura sco decoratura da tribuna independenta e fotografa. L'onn passà ha ella obtegnì il diplom cun distincziun da la classa superiura per decoraziun da tribuna e da film da l'universitad per art applitgà a Vienna. Ella survegn ina contribuziun per ses project fotografic "Heimatbilder".

Urs Frey
Il cineast grischun Urs Frey realisescha dapi quatter onns sco reschissur liber films documentars per la televisiun. Ses films èn vegnids premiads gia pliras giadas sin plaun internaziunal. Urs Frey ha acquistà sias enconuschientschas autodidacticamain. El survegn in stipendi liber per sa scolar vinavant en il sectur da camera e tagl.

Valentin Kessler
Valentin Kessler dal Partenz che viva a Masein ha fatg in num grazia a sia originalitad e sia musicalitad sco accordeonist tschertgà lunsch sur il cunfin da noss chantun ora. Sco cumponist ha el gia cumponì musica per differents projects da teater e da films, e sco musicist ha el collavurà tar producziuns cun persunalitads naziunalas ed internaziunalas (Andreas Vollenweider, Billy Cobham, Max Lässer e.u.v.). Valentin Kessler survegn in stipendi liber per pudair cuntinuar cun sia lavur sin il champ da la musica.

Martina Hug
La chantadura da Cuira Martina Hug ha terminà ses studi l'onn 2001 al conservatori a Neuchâtel cun il diplom d'instrucziun. La giuvna sopranista ha gia chantà bleras parts solisticas en ovras sacralas, ella è sa preschentada sco interpreta da chanzuns - dal baroc fin tar chansons - ed ha er collavurà sporadicamain en operas. Martina Hug survegn in stipendi liber per pudair sa scolar vinavant en il sectur da l'opera.

Gaudenz Badrutt
Il pianist e cumponist grischun Gaudenz Badrutt ha cuntanschì il diplom da concert "cun distincziun" l'onn 2001 a la scol'auta da musica e teater a Bienna. El s'occupa cunzunt da la musica contemporana. La confruntaziun cun la musica electronica en il champ da tensiun tranter la musica improvisada e la musica contemporana furma la segunda pitga da sia activitad. Gaudenz Badrutt survegn in stipendi liber per pudair cuntinuar cun la lavur sco pianist e musicist d'electronica.

Theres Jörger
L'onn 2001 ha l'artista da Laax Theres Jörger ha terminà cun diplom ses studi "communicaziun visuala" a la scol'auta d'art visual e d'art applitgà a Lucerna. Dapi alura lavura ella sco artista visuala independenta. Ella s'occupa cunzunt dal tema "tipografia e spazi". Ses project "Raumschrift" è interdisciplinar essend ch'el s'occupa da la grafica, da la lingua e da la sculptura. Theres Jörger survegn ina contribuziun per la realisaziun dal project "Raumschrift".

Evelina Cajacob
L'artista che viva a Malans po gia preschentar in'ovra considerabla. Sias ovras, en emprima lingia sias installaziuns nua ch'ella sa fatschenta cun differentas materialias e differents spazis dattan perditga d'in agen tractament persvadent da las furmas. Evelina Cajacob survegn in stipendi liber per qua tras pudair sa concentrar sin sia lavur artistica sur in lung temp.

Leta Peer
L'artista grischuna Leta Peer che viva a Basilea s'occupa da meds da la pictura e da la fotografia dal tema "uman e cuntrada". Il project "non places" è in svilup ulteriur da quest tema, nua ch'ils accents "identitad" e "patria" duain vegnir reunids. Leta Peer survegn ina contribuziun ad in'ovra per pudair realisar ses project "non places".
La cumissiun da concurrenza sa cumpona dals commembers permanents: Valentin Bearth, Hanspeter Hänni, Peter Masüger, Carlo Portner, Silva Semadeni e Peter Trachsel; latiers èn vegnids consultads trais experts externs, la musicista Kornelia Bruggmann, l'intermediatura da musica Katrin Gantenbein ed il cumponist Anton Prestele.

Da las vischnancas e las regiuns
La vischnanca da Poschiavo ha dacurt inoltrà ils projects da rempars Val da Sumain, Val Cölögna e Val Tiglieu per l'approvaziun e per la garanzia da contribuziun. Ils projects duain proteger il territori da colonisaziun cunter bovas, sco ch'ellas èn succedidas suenter las fermas precipitaziuns da Tschuncaisma 1983 e dal november 2000. La regenza grischuna approva ils projects e conceda ina contribuziun chantunala da 198'000 francs.
Per projects da contrucziun en las vischnancas da Jenins (parcadis), Furna (lavurs da construcziun vi da la via champestra Wolfegga-Scära) e Claustra-Serneus (project da rempars da lavinas "Rüggen") ha approvà la regenza contribuziuns en la summa totala da 360'000 francs. Plinavant ha la regenza approvà la revisiun parziala da la lescha da taglia sco er la revisiun parziala da la planisaziun da la vischnanca d'Andiast (plan da zonas da privel part dal territori "Run").
Per differents projects da construcziun sin la A13, la via dal Güglia e dal Malögia ha la regenza grischuna approvà in credit da circa trais milliuns francs.

Contribuziuns chantunalas a differentas instituziuns
Per la construcziun nova da la chasa d'attempads e da tgira Alvra a Alvagni ha la regenza grischuna approvà ina contribuziun chantunala vi da la construcziun da maximal 5.35 milliuns francs. La contribuziun chantunala resulta da la forza finanziala da las vischnancas participadas a la chasa d'attempads e da tgira Alvra.

Chanzlia chantunala grischuna

Gremi: regenza
Funtauna: rg chanzlia chantunala grischuna