Durant l'onn da scola 2002/03 entschaiva il stgalim superiur da la scola populara dal chantun Grischun a realisar il nov concept da linguas. L'offerta minimala consista per tut las scolaras ed ils scolars grischuns da trais linguas en il sectur obligatori (duas linguas chantunalas ed englais) sco er da duas linguas estras en il sectur facultativ (ina lingua chantunala e franzos).
La scolaziun per persunas d'instrucziun da talian e d'englais che vegn purschida dal chantun è in success. Cun satisfacziun pon ins constatar che totalmain han absolvì gia passa 150 magistras e magisters las scolaziuns pretensiusas cun grond engaschi u absolveschan quellas uss. A basa d'ina retschertga ch'è vegnida fatga da curt tar las vischnancas cumpetentas per l'engaschament da persunas d'instrucziun, na disponan singulas scolas dal stgalim superiur tuttina betg anc d'in dumber suffizient da magistras e magisters cun ina scolaziun correspundenta per l'instrucziun obligatoria da las linguas estras. Il departament d'educaziun ha giavischà ils purtaders da questas scolas da laschar instruir anc pliras persunas d'instrucziun per garantir la qualitad da l'instrucziun da lingua estra. Al davos curs da scolaziun ch'entschaiva la primavaira 2003 stattan puspè a disposiziun suffizientamain plazzas da scolaziun tant per la scolaziun d'englais sco er per la scolaziun da talian. Il termin d'annunzia dura fin il 1. da fanadur 2002.
Cuntrariamain al talian ed a l'englais n'è betg vegnì elavurà in program da scolaziun unifitgà per l'instrucziun da rumantsch sco lingua estra sin il stgalim superiur da la scola populara. La situaziun da las singulas scolas dal stgalim superiur al cunfin linguistic sco er las enconuschientschas da rumantsch da las persunas d'instrucziun pertutgadas èn memia differentas. Per tut questas magistras e per tut quests magisters datti dentant la pussaivladad da cumpilar, ensemen cun l'uffizi per las scolas popularas e las scolinas, in program spezial ch'è adattà a la singula persuna ed a la situaziun concreta da la scola.
Igl è in giavisch dal departament d'educaziun da sustegnair er en l'avegnir tant sco pussaivel las vischnancas ch'èn cumpetentas per la recrutaziun e per l'engaschament da persunas d'instrucziun en lur incumbensa difficila e pretensiusa.

Gremi: departament d'educaziun, cultura e protecziun da l'ambient
Funtauna: rg uffizi per las scolas popularas e las scolinas