L'ordinaziun davart la protecziun da las zonas umidas d'impurtanza naziunala è en vigur dapi 1992. Ussa duai vegnir cumplettà per la segunda giada l'inventari respectiv. En sia davosa sesida ha la regenza grischuna deliberà la consultaziun respectiva per mauns da l'uffizi federal d'ambient, guaud e cuntrada.

La segunda cumplettaziun planisada da l'inventari da las zonas umidas cumpiglia surtut zonas umidas dal stgalim montan e subalpin. Dal chantun Grischun duain uss vegnir recepids da nov 22 objects en l'inventari federal da las zonas umidas d'impurtanza naziunala. L'inventari vertent da fin uss cumpiglia dal puntg da vista grischun gia 58 objects. En sia consultaziun ha la regenza grischuna approvà en general da recepir en il rom da questa segunda cumplettaziun quatter ulteriurs objects en l'inventari.

Resalvas e refusaziuns
En cas d'ulteriurs indesch objects ston ins anc sclerir dumondas concernent ils cunfins e dumondas spezialas d'utilisaziun ch'eran gia existentas (utilisaziun d'alps, explotaziun da glera, stabiliments da tir). La regenza approva be cun resalva la recepziun en l'inventari federal da las zonas umidas.
Set objects vegnan refusads surtut da las vischnancas da staziunament. Quests objects rinviescha la regenza per examinar e sclerir ils conflicts existents (cunfins, utilisaziun agricula e turistica e protecziun cunter auazuns). Essend che las vischnancas vegnan incumbensadas en emprima lingia cun las incaricas da surveglianza e da realisaziun n'èsi tenor la regenza betg raschunaivel da recepir quests objects en l'inventari senza l'approvaziun da las vischnancas.

Dretg da cogestiun expressiv
La regenza ha exprimì resalvas generalas visavi l'inventari da las zonas umidas gia en occasiun da l'emprima cumplettaziun il 1. d'avust 2001. Surtut las resalvas e las consideraziuns concernent ils dretgs vi da las auas e concernent rempars da protecziun valan anc oz. La regenza sa resalva in dretg da cogestiun absolut en cas d'objects che tangheschan construcziuns e stabiliments per la producziun d'energia u per la protecziun d'umans e da chaussas.
Dals 22 objects en il chantun Grischun che vegnan proponids per la recepziun en l'inventari da las zonas umidas han las 38 vischnancas pertutgadas gia oz attribuì 20 parzialmain u dal tuttafatg ad ina zona da protecziun da la cuntrada u da la natira.

Medioteca uss sco provisori
La medioteca per la scol'auta professiunala da pedagogia vegn construida ad interim en furma d'in provisori. La regenza grischuna ha concedì 780'000 francs per il pavigliun da lain ch'è previs per quest intent.
Oriundamain avevan ins planisà in edifizi nov sin l'areal da la scola da dunnas. En occasiun da la sessiun da matg èn la cumissiun predeliberanta dal cussegl grond ed il cussegl sez s'exprimids cunter quest project; per differents motivs han els pledà en favur d'in provisori. La medioteca vegn a star a disposiziun en questa furma gia a l'entschatta da l'onn da scola 2002/2003.

Campagna d'infurmaziun per l'agricultura
L'uniun purila svizra (UPS) lantschescha ina campagna d'infurmaziun cun la finamira da documentar la midada da structura en il sectur agrar. Sco med per quest intent ha la UPS realisà il film "Umbruch - Die Schweizer Bauern unterwegs in die Zukunft".
tut en tut muntan ils custs da quest project a circa 750'000 francs. Il chantun Grischun sa participescha als custs da realisaziun cun circa 12'500 francs.

Da las vischnancas e regiuns
Per la nova construcziun d'ina halla da gimnastica cun trais stanzas da classa sco er per sanar la veglia chasa da scola a Sarn ha la regenza grischuna mess en vista ina contribuziun vi da la construcziun da circa 1,7 milliuns francs.
La fundaziun chasa da tgira e d'abitar Val S. Pieder vul construir a Val S. Pieder in nov edifizi cun ina gruppa da tgira che cumpiglia sis letgs e quatter abitaziuns per persunas attempadas che survegnan assistenza. La regenza garantescha a quest project ina contribuziun chantunala maximala da circa 187'000 francs.
La Bogn Engiadina Scuol SA obtegna dal chantun ina contribuziun da circa 198'000 francs per l'extensiun dal "bogn roman-irlandais".Il project cumplessiv munta a circa trais milliuns francs.
Las vischnancas d'Alvagni e Maiavilla han revedì lur lescha da taglia. La rgenza ha approvà questas leschas communalas en occasiun da sia davosa sesida.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun