Il scumond absolut da far fieu en il guaud ed en la vischinanza dal
guaud resta en vigur fin il 1. d'avust!
L'uffizi forestal dal Grischun insista, en cunvegna cun l'uffizi
chantunal da polizia da fieu, sin il scumond absolut da far fieu ch'è
vegnì ordinà per il guaud ed per la vischinanza dal guaud fin il 1.
d'avust.
Las precipitaziuns dals ultims dis han bain manà ad ina reducziun da
la setgira ordaifer il guaud. Per bagnar il terren da guaud ed il
bostgam e per metter ord vigur il scumond da far fieu absolut che vala
dapi emnas na tanscha la quantitad da plievgia crudada però lunschor
betg. Las precipitaziuns prognostitgadas fin il 1. d'avust na vegnan a
midar nagut vi da la gronda setgira en ils guauds Grischuns. Uschia èsi
anc adina scumandà da far fieu en il guaud ed en la vischinanza dal
guaud. Cigarettas u zulprins envidads na dastgan vegnir bittads davent
en nagin cas. I vegn recumandà urgentamain da far diever cun gronda
precauziun sulettamain da fuainas installadas fixas che dastgan vegnir
abandunadas be sch'ellas èn stizzadas.
En vista a las festivitads dal 1. d'avust recumondan l'uffizi
forestal e l'uffizi da polizia da fieu chantunal a las vischnancas da
renunziar dal tuttafatg a fieus artifizials. In fieu natiral grond po
sut circumstanzas vegnir fatg en in lieu segirà e surveglià dasper la
vischnanca e quai cun las mesiras organisatorias da precauziun
necessarias. Fieus en il liber dastgan vegnir fatgs en mintga cas be en
cunvegna cun las autoritads communalas e cun ils corps da pumpiers
cumpetents. Tar permissiuns excepziunalas duain ins resguardar l'effect
exemplar visavi terzas persunas.
Las davosas emnas èn vegnids registrads passa 25 incendis da guaud
en il chantun Grischun. Ils custs che resultan da quai importan tranter
400'000 - 500'000 francs. Guauds ch'han ina giada tschiffà fieu na pon
betg sa calmar durant emnas fin la proxima plievgia permanenta. Quai
cumprova in incendi da guaud da passa quatter emnas a Sta. Maria en
Calanca, che n'ha malgrà la plievgia betg pudì vegnir stizzà fin oz.
Gremi: uffizi forestal dal Grischun
Funtauna: rg uffizi forestal dal Grischun