Tar l'access Scuol vest/Ftan a la via d'Engiadina sa tracti d'ina cruschada en cumparegliaziun fermamain frequentada che vegn a survegnir in'impurtanza anc pli gronda sche las cumplettaziuns da las vias principalas en il territori Nairs fin Scuol èn terminadas. Adina puspè hai dà là accidents en il passà, per part er grevs. Pervi da quest svilup han ins fatg gia avant in pèr onns ponderaziuns per pudair augmentar la segirezza da traffic tar quella cruschada. Perquai ch'i sa cruschan a quel lieu duas vias chantunalas orientadas al traffic cun immissiuns da traffic sumegliantas s'impona la construcziun d'ina rundella, cumbain che la via principala sa chatta en la regiun extralocala.

Suenter tractativas intensivas ha l'uffizi federal da vias garantì ina contribuziun da subvenziun per il project cun la cundiziun che la realisaziun da la rundella succedia anc l'onn 2003. Las lavurs da construcziun cumenzan oz e duran fin var la fin d'october 2003. L'installaziun da la davosa cuvrida sco er la concepziun definitiva da l'insla da mez succedan l'onn che vegn.

Durant il temp da construcziun resta la via d'Engiadina charrabla a dus vials. La via da la staziun è charrabla mosin in vial tranter il punct da la plazza da martgà tar la staziun fin var 200 meters sut il punct per la via d'Engiadina. In sviament è signalisà. Cun andaments da construcziun optimads vegn fatg tut per reducir ils impediments da traffic ed il temp da construcziun ad in minimum. L'uffizi da construcziun bassa spera sin la chapientscha da tut ils utilisaders da la via e da tut ils pertutgads.

Legendas cun links:
- La rundella planisada en la situaziun ( 522 Situation.jpg )
- Sguard sin l'access odiern Scuol vest ( 522 Kreuzung.jpg )

Gremi: Uffizi da construcziun bassa
Funtauna: rg Uffizi da construcziun bassa