La chasa editura per meds d'instrucziun CEMI vegn a sa concentrar
anc pli fitg sin sias cumpetenzas-clav, l'elavuraziun, la producziun e
l'ediziun d'agens meds d'instrucziun. Perencunter vegn il sectur
commerzi e vendita excorporà cumplettamain: Sper ils secturs che vegnan
gia ussa tgirads externamain sco magasinaziun, servetsch
d'empustaziun/administraziun, distribuziun dals meds d'instrucziun ed il
online-shop vegnan tranter auter er surdads externamain la vendita, il
marketing, l'exposiziun da meds d'instrucziun e la redacziun dal catalog
da meds d'instrucziun. Quest concept vegn realisà fin la fin da l'onn
2004 da l'uffizi per la scola populara ed il sport. Parallelamain ha la
regenza er decidì da reorganisar fin la primavaira 2004 la cumissiun
chantunala per meds d'instrucziun.
Da vischnancas e regiuns
- Planisaziuns localas revedidas: La regenza ha approvà la revisiun
da differents meds da planisaziun da las vischnancas da Tschlin,
Versomi, Lüen, Schlarigna e Trun.
- Nov passape: A Leggia po vegnir construì il nov passape per lung
da la via taliana. La contribuziun chantunala importa var 226'000
francs.
Contribuziuns chantunalas a differentas instituziuns
- Lottaria naziunala: La regenza ha approvà var 380'000 francs sco
contribuziuns per intents culturals. 69 instituziuns vegnan resguardadas
qua tras.
- Uniun per l'agid da survivenza: La regenza ha fixà per ils onns da
gestiun 2003 e 2004 mintgamai ina contribuziun pauschala da 256'000
francs. La pauschala 2004 vegn approvada definitivamain dal cussegl
grond en il rom da la debatta dal preventiv 2004.
- Guaud da Staz: Per metter sut terra in conduct liber da las ovras
electricas da San Murezzan ha la regenza approvà ina contribuziun
chantunala da var 87'000 francs. Quest project stat en connex cun la
spustaziun da la loipa da passlung tras il guaud da Staz.
- Musica da giuvenils Cuira: 6500 francs survegn la musica da
giuvenils da Cuira per renovar ses instruments.
Projects da vias
- Per var 600'000 francs vegnan installads indrizs sanitars novs sin
la plazza da pussar Apfelwuhr da la A 13 tar Zizers.
Chaussas persunalas
Josef Nauer, Oberuzwil, è vegnì elegì sco manader da l'uffizi AI da
l'institut d'assicuranza sociala dal chantun Grischun. El entschaiva sia
plazza il 1. da november 2003.
chanzlia chantunala dal Grischun
Gremi: regenza
Funtauna: rg chanzlia chantunala dal Grischun