A las abitantas ed als abitants
dal chantun Grischun

Stimadas conburgaisas e stimads conburgais

Las baselgias cristianas festiveschan quest onn l'onn da la Bibla. El stat sut il motto "tschertgar e chattar" e vul trair endament la significaziun religiusa e culturala da la Bibla.

La Bibla ha autras prioritads che quellas che han forsa la politica e la vita commerziala cun lur agir orientà a l'intent. Ella raquinta da las experientschas da Dieu cun ils umans e da las experientschas dals umans cun Dieu. Ella rapporta da Jesus Cristus che ha proclamà l'amur da ses bab per nus e ch'il reginavel da Dieu arrivia bainbaud. El sulet po crear in "nov tschiel" ed ina "nova terra". Quai na vul dentant betg dir che la cretta cristiana saja apolitica, il cuntrari. Là nua ch'ils umans crain al evangeli, ha quai consequenzas per tut ils secturs da la vita. Il reginavel da Dieu n'è bain betg da quest mund, ma el duai dar l'impressiun d'esser en quest mund.

Gist en noss temp sa mida la societad en ina dimensiun, da la quala nus essan sezs stuts. En la situaziun da mintgadi dad oz na chattan blers umans pli la via. I regna ina malsegirezza davart la dimensiun, la valur e la finamira dal bainstar economic, davart il senn dal progress tecnic. Ins ha sco l'impressiun che la survista fiss ida a perder. Nus essan surprendids ch'ils blers umans en noss conturns vivan en bainstanza e ch'els n'èn tuttina cleramain betg cuntents. Als umans vai meglder, però els na daventan perquai insumma betg pli cuntents.

Gia en la Bibla legiain nus: "L'uman na viva betg mo dal paun" (Mt 4,4). Questa frasa è pli actuala che mai. Sco ch'i para sto vegnir garantì dapli ch'il bainstar. I ston vegnir obtegnidas valurs che stattan da l'autra vart da la purschida e da la dumonda e ch'ils umans dovran necessariamain per la vita da mintga di: ambient saun, amur umana, segirezza, confidenza, sentiment per la vita.

Ina cuminanza na viva betg mo da bunas infrastructuras, da normas legalas e da martgads che funcziunan. I dat valurs communablas istoricas e culturalas, las qualas nus partain en cuminanza, tuttina che funcziun che nus avain en la cuminanza, tuttina che posiziun che nus represchentain là, tuttina sche nus stain a dretga u a sanestra. Ina societad vegn er tegnida ensemen da leschas betg scrittas, da valurs, da normas e reglas moralas che dattan a noss agir ina direcziun e che ans inchargian ina responsabladad.

Senza questas valurs na po betg funcziunar ina cuminanza a la lunga.

Perquai faschain nus tuts bain da tgirar nossa cuminanza. Da renovar il sentiment per la cuminanza, d'examinar l'agen cumportament, da metter puspè en dumonda las atgnas imaginaziuns, da tgirar l'appartegnair ensemen. La convivenza en ina cuminanza n'è mai ina acquisiziun definitiva. Ella è in'ovra che sto adina puspè vegnir creada e meritada da nov en confruntaziun cun las necessitads actualas.

La Rogaziun federala dà a nus l'occasiun da daventar conscients da quai. Ponderain tge che mintgin da nus po contribuir concretamain a ses lieu, en la famiglia, en la professiun, en funcziuns ed uffizis publics per che las valurs da basa da la cretta cristiana hajan adina puspè in effect evident sin nossa societad. Empruvain d'agir ensemen mintga di suenter quests princips, surtut là nua che nus avain fadia. Per quai As supplitgain nus!

Cun quests patratgs As recumandain nus, charas conburgaisas e chars conburgais, e tut noss conumans ed er nus en ils mauns dal Tutpussant.

Cuira, il settember 2003

En num da la regenza
Il president: Stefan Engler
Il chancelier: dr. C. Riesen

Gremi: Regenza
Funtauna: rg Chanzlia chantunala