La lescha davart l'egualitad dals impedids va en vigur il schaner 2004. Duas ordinaziuns reglan ils detagls: ina da quellas concerna las pretensiuns ad in traffic public che resguarda ils basegns da las persunas impedidas. L'autra è avant maun sco sboz e regla tranter auter las incumbensas dal biro per l'egualitad dals impedids e dat criteris co ch'ils interess da las persunas impedidas ston vegnir valitads tar l'adattaziun d'edifizis en cumparegliaziun cun ils interess da la protecziun da l'ambient, da la natira e da la patria. Plinavant pon ins leger en l'ordinaziun davart l'egualitad dals impedids co che las valurs maximalas per custs d'adattaziun previsas en la lescha ston vegnir calculadas.

La regenza grischuna sustegna da princip il sboz da l'ordinaziun. Intschert è però vinavant sch'ils chantuns ston stgaffir in'atgna basa legala per il sectur da construcziun tenor ils basegns da persunas impedidas u betg. Ultra da quai giavischa la regenza er ina reglamentaziun pli clera areguard la lingua. Igl è decisiv sch'igl è per exempel manegià cun noziuns sco "access ad edifizis" la zona da l'entrada principala u però l'access a tut las localitads. Plinavant n'èsi betg cler daco che la patruna u il patrun sto argumentar ils motivs per in nunengaschament da persunas cun impediments, entant che persunas senza impediments che aspireschan per ina plazza na pon betg pretender quai. La nova ordinaziun duai - sco la lescha davart l'egualitad dals impedids - medemamain entrar en vigur il schaner 2004.

Dumondas dals esters: sa stentar per l'integraziun là, nua ch'igl è raschunaivel
La confederaziun vul meglierar l'acceptanza da la societad e l'independenza finanziala da persunas da l'ester ch'èn vegnidas retschettas mo provisoriamain en Svizra. Ellas duain pudair retrair uschenumnadas "prestaziuns d'integraziun". Latiers tutga per exempel er il "rinforz da la cumpetenza sociala" per survegnir la capacitad d'insumma pudair turnar en lur patria. La confederaziun vul cuntanscher questa finamira cun reveder l'ordinaziun d'integraziun; la regenza grischuna sa dosta cunter quai. Per questa gruppa da persunas è la dimora permanenta en Svizra numnadamain vegnida refusada cun vigur legala. I n'ha perquai nagin senn da promover ina integraziun en Svizra cun mesiras supplementaras. Mesiras per rinforzar la cumpetenza sociala pudessan però vegnir prestadas sut il titel da l'agid da returnar en il rom d'ina procedura d'asil. Sco en urden considerescha la regenza percunter l'intenziun da spetgar ina contribuziun activa da persunas da l'ester per lur atgna integraziun.

L'uschenumnada "ordinaziun da limitaziun" regla las circumstanzas per laschar suandar las famiglias da conburgaisas e conburgais cun ina permissiun da dimora. La lescha federala davart la dimora ed il domicil dals esters prescriva che la furmaziun professiunala da basa dals uffants stoppia esser garantida latiers. Perquai vul il cussegl federal reveder l'ordinaziun da limitaziun uschia, ch'i sto da princip vegnir pretendì entaifer tschintg onns da laschar suandar las famiglias. Encunter la finamira principala da la revisiun d'integrar giuvenils areguard la professiun n'ha la regenza grischuna da far naginas objecziuns. Però è ella sceptica areguard la via elegida. Per ch'uffants esters possian vegnir integrads areguard la professiun, na duessan els betg avair dapli che 14 onns cura ch'els vegnan en Svizra. La regenza propona perquai da fixar en l'ordinaziun ina vegliadetgna maximala empè d'in termin da dumonda da tschintg onns. Tuttas duas ordinaziuns duain entrar en vigur il schaner 2004.

Da vischnancas e regiuns
- Mulegns: La regenza ha approvà il program da sanaziun cunter la canera sin la via dal Güglia.
Contribuziuns chantunalas a diversas instituziuns
- Hotel da scola Passugg: La regenza ha approvà definitivamain il project per la construcziun nova dal tract da la curt interna e per la segunda etappa da construcziun da la restauraziun interna. La contribuziun chantunala importa var 590'000 francs.
- Uniun d'interess Schaniela: La contribuziun chantunala per las sereneras communablas da las vischnancas da St. Antönien e da St. Antönien-Ascharina ha la regenza fixà sin var 670'000 francs.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun