Il chantun Grischun ha dà ina nova basa a sia pratica da promoziun per ils credits d'agid d'investiziun a las pendicularas. Da nov vegnan integrads ils indicaturs da l'economia da manaschi pli fitg che fin uss en la valitaziun. Las ponderaziuns strategicas e regiunalas survegnan dapli paisa e la pressiun da midar las structuras vegn accentuada explicitamain.

Lescha davart las vias: las vischnancas ston pajar dapli
La regenza ha adattà las disposiziuns executivas tar la lescha davart las vias vertenta. Uschia vegnan sbassadas las contribuziuns chantunalas a la realisaziun da vias per peduns, fermadas da bus, stabiliments da chanalisaziun e da vias da velos. Ultra da quai vegnan augmentadas las contribuziuns communalas per cuvridas da vias en il vitg. La revisiun da las disposiziuns executivas tar la lescha davart las vias era vegnida incumbensada dal cussegl grond durant la sessiun d'avust.

Reducziun da las premias: l'execuziun è vegnida reglada da nov
Ils daners per la reducziun da las premias èn vegnids pajads, en il senn d'ina soluziun transitoria, l'onn 2003 tant directamain a persunas privatas sco er a tschertas cassas. Davent da l'onn 2004 vegnan pajadas las reducziuns da las premias mo pli a las uschenumnadas "persunas cun dretg d'ina reducziun". La regenza ha approvà il concept correspundent per l'execuziun da la reducziun da las premias.

Convenziun da l'ONU cunter la tortura: realisaziun tras in concordat
Il chantun Grischun sustegna la ratificaziun dal "protocol facultativ tar la convenziun da l'ONU cunter la tortura ed auters tractaments u chastis crudels, inumans u degradants". Ils custs per la realisaziun naziunala dal protocol na sa laschan dentant anc betg prevair e stimar il mument sin plaun naziunal e chantunal. Perquai propona la regenza grischuna d'obtegnair la realisaziun dal protocol tras in concordat per l'entira Svizra. En quest senn era gia s'exprimida er la conferenza da las directuras chantunalas e dals directurs chantunals da giustia e polizia.

Da vischnancas e regiuns
- Glion: La nova lescha davart las taxas da cura e la taxa per promover il turissem po entrar en vigur. La regenza l'ha approvada.

Contribuziuns chantunalas a diversas instituziuns
- Agid umanitar: La regenza ha accordà totalmain 34'000 francs. Ils meds van en favur da paun per tuts, Helvetas, mediCuba-Suisse, Fundación Para Los Indios del Ecuador, ovra d'agid svizra dals lavurers, crusch cotschna svizra, terre des hommes agid per l'uffant e Vétérinaires Sans Frontières.
- Promoziun da cultura: Per 18 ovras ed occurrenzas culturalas ha la regenza deliberà totalmain 125'000 francs.
- Infrastructuras turisticas ed autras: Per l'avertura dal stabiliment da temp liber Fontanivas a Mustér e per il nov center dal parc naziunal a Zernez ha la regenza empermess totalmain var quatter milliuns vi da credits d'investiziun da la confederaziun e var in milliun vi da contribuziuns chantunalas.
- Skis e snowboard: Il chantun vegn a sustegnair finanzialmain trais occurrenzas en l'Arena da las Alps il proxim enviern: il cup mundial da snowboard FIS, il cup mundial da skis FIS ed il cup mundial skicross FIS. Totalmain ha la regenza empermess per quai var 60'000 francs en furma da contribuziuns ed ina garanzia da deficit da var 30'000 francs.

Persunal
- Chapitani Robert Willi è vegnì numnà en la posiziun d'in litinent colonel ad emprim substitut e primlitinent Gianfranco Albertini en la posiziun d'in maior a segund substitut dal cumandant da la polizia chantunala dal Grischun. Els entschaivan lur novas funcziuns il 1. da schaner 2004.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun