La regenza approvescha la revisiun parziala da las disposiziuns executivas tar la lescha davart ils supplements da famiglia. Cun l'augment dal supplement da famiglia per il 1. da schaner 2003 èn vegnidas augmentadas las tariffas da contribuziun dals patruns, la contribuziun da finanziaziun sco er la tariffa da contribuziun da las persunas cun activitad da gudogn independenta che han il dretg da retratga. Il svilup finanzial da la CCF chantunala è actualmain meglier che prognostitgà oriundamain. La regenza concluda perquai da sbassar la tariffa da contribuziun dals patruns da 1.95 % a 1.80 % sco er da sbassar la contribuziun da finanziaziun dals lavurants da la CCF a las persunas cun activitad da gudogn independenta da la CCF da 0.12 % a 0.11 % da la summa da la paja brutta. Questa revisiun parziala entra en vigur il 1. da schaner 2004.

Consultaziun dal sboz dal rapport davart la ratificaziun da la charta sociala europeica
La charta sociala europeica sco cunvegna internaziunala ha da princip la finamira d'assimilar pass per pass las relaziuns economicas e socialas dals commembers da las partidas contrahentas. La regenza ha prendì posiziun areguard il sboz dal rapport davart la ratificaziun da la charta sociala europeica. Ella na fa naginas resalvas. En il chantun Grischun è realisabla in'assimilaziun a la cunvegna cun in sforz legislativ minimal. La posiziun è sa referida oravant tut a dumondas davart il dretg da chauma, il tractament egual tar prestaziuns da famiglia sco er davart il tractament egual en il sectur dal provediment social.

Tractament staziunar en chasas da tgira e partiziuns da tgira
La regenza approvescha il contract tariffar dals 21 da fanadur 2003 tranter la federaziun chasas ed ospitals (C+O) e la santésuisse dal Grischun concernent il tractament staziunar en chasas da tgira e partiziuns da tgira.

Da vischnancas e regiuns
- Malix: Las revisiuns parzialas da la lescha da construcziun sco er dal plan da zonas parzial 1:2'000 "Müli/Pala" deliberadas il 1. da december 2000 ed ils 23 da matg 2003 vegnan approvadas da la regenza.
- Roveredo GR, Lumino, Arbedo-Castione e S. Antonio: Il cunfin chantunal Grischun - Tessin tranter las vischnancas da Roveredo GR e las vischnancas tessinaisas da Lumino, Arbedo-Castione e S. Antonio vegn approvà tenor il plan 1:10'000 da l'avrigl 2003.
- Alvagni vitg: La regenza concluda d'integrar la chasa d'attempads e da tgira Albula en la glista da las instituziuns a lunga durada (glista da las chasas da tgira) dal chantun Grischun, e quai cun effect davent dal 1. da december 2003.

Contribuziuns chantunalas a diversas instituziuns
- Schlans: La vischnanca è vegnida pertutgada zunt fitg da las malauras dal mais da november 2002. Per renovar ed amplifitgar l'indriz per la provisiun d'aua garantescha il chantun contribuziuns als custs cun dretg da contribuziun da totalmain 309'000 francs.
- Mesauc, Soazza, Lostallo, Leggia, Grono, Roveredo, Castaneda, Buseno: Il project "refar selvas da chastagners, 2. etappa" cun custs totals da 390'000 francs vegn approvà. A las vischnancas vegn garantida ina contribuziun chantunala da 105'000 francs.
- Arosa: La regenza concluda d'integrar la revisiun dal cataster d'Arosa en il program da mesiraziun 2003 e garantescha ina contribuziun da 11'800 francs als custs imputabels che restan suenter la deducziun da las contribuziuns federalas.
- Val Müstair: A la societad da megliuraziun Val Müstair vegnan concedids 150'000 francs per la terz'etappa da la revitalisaziun dal Rom.
- Museum d'art dal Grischun: Per il project "Andrea Garbald (1877-1958), fotograf" deliberescha la regenza ina contribuziun da sustegn da 13'000 francs. Cun quai duai vegnir serrada ina largia delicatada perscrutaziun.

Projects da vias
- 1.75 milliuns francs ha la regenza approvà per differents projects da vias:
- mir da sustegn nord, tunnel Val d'Infiern, via da Calanca-Mesauc
- mir da sustegn sid, tunnel Val d'Infiern, via da Calanca-Mesauc
- lavurs d'impressari, San Vittore, via taliana A13-Mesauc
- La regenza approvescha il program da sanaziun cunter la canera per la via dal Fuorn en il sectur da la vischnanca da Müstair.


chanzlia chantunala dal Grischun

Gremi: regenza
Funtauna: rg chanzlia chantunala dal Grischun