La "statistica federala da l'effectiv annual da la populaziun ESPOP" che vegn publitgada in onn avant las elecziuns cirquitalas è decisiva per la repartiziun dals mandats al cussegl grond en ils circuls: per las elecziuns cirquitalas 2003 vala damai l'ESPOP da l'onn 2001 che mussa l'effectiv da la populaziun svizra a la fin da december 2001. L'uffizi federal da statistica ha ussa er armonisà la ESPOP 2001 cun ils resultats da la dumbraziun federala dal pievel 2000 ed ha publitgà las cifras definitivas.
L'art. 3 da la lescha davart la represchentanza dals circuls en il cussegl grond dal chantun Grischun regla la procedura da repartiziun. Tenor quai datti en dus circuls spustaments dals mandats: Il circul da Mesauc gudogna in mandat a cust dal circul dals Tschintg Vitgs.
A la repartiziun dals mandats al cussegl grond sin ils singuls circuls pon ins prender invista qua (datoteca pdf cun pussaivladad da chargiar sin il agen computer).

L'emprima incarica da prestaziun per il nov center da furmaziun per la sanadad ed ils fatgs socials La regenza grischuna ha dà al nov center da furmaziun per la sanadad ed ils fatgs socials CSS l'emprima incarica da prestaziun. Quel regla detagls da la purschida da prestaziuns, en spezial davart scolaziuns en il sectur secundar e terziar sco er sin il champ da la furmaziun supplementara. Cun l'incarica da prestaziun preschenta vegn l'integraziun da las quatter scolas ch'han fusiunà e da las differentas purschidas da prestaziuns garantidas formalmain. L'incarica da prestaziun po vegnir adattada en cas da basegn entaifer temp util a las pretensiuns actualas. Per la fin da l'onn 2003 vegn il CSS ad examinar l'incarica da prestaziun.
Ils curs da scolaziun entschaivan sin il stgalim secundar II l'avust 2004. Il medem mument vegn purschida ina maturitad professiunala cumplementara a l'emprendissadi.

L'ordinaziun davart suns e radis da laser OSL sto vegnir repassada
Problems d'execuziun en ils chantuns ed ina protecziun sanitara en general memia bassa cunter livels da sun e radis da laser sforza la confederaziun da reveder totalmain l'ordinaziun davart suns e radis da laser OSL da l'onn 1996. En quest connex mira la revisiun sin ina execuziun unitara ed effizienta sco er sin l'atgna responsabladad dals organisaturs e da l'auditori.
Il sboz da l'ordinaziun prevesa ch'ils chantuns hajan da surpigliar in rolla da guid per sensibilisar la populaziun. La regenza grischuna metta perencunter patg sin l'uffizi federal da sanitad publica e sin ina campagna naziunala per organisaturs ed auditori. En la realisaziun decentrala vegniss ina tala campagna sustegnida dals chantuns. Ultra da quai s'engascha la regenza er per la protecziun da las lavurantas e dals lavurants ch'èn exponids al sun durant l'entir temp da lavur. Las disposiziuns davart la protecziun da las lavurantas/dals lavurants na pudessan gnanc vegnir resguradadas, sche las OSL vegnissan decretadas cun las restricziuns d'emissiun ch'èn vegnidas proponidas.
Enfin ussa existiva per occurrenzas cun laser mo in'obligaziun d'annunzia. Da nov è prevesida in'obligaziun da dumandar ina permissiun. Sper incumbensas che n'èn praticamain betg schliablas per las autoritads executivas (per regla las autoritads communalas) na fiss tenor l'avis da la regenza ina tala obligaziun da dumandar ina permissiun betg consolidada giuridicamain.

Scola chantunala: ina fundaziun per il 200avel anniversari
L'onn 2004 vegn la scola chantunala dal Grischun 200 onns. Il rectorat planisescha per l'onn da giubileum diversas activitads. La regenza grischuna ha approvà il project, da constituir la "fundaziun da cultura e studis da la scola chantunala dal Grischun". Da princip ha la fundaziun l'intenziun da sustegnair ovras culturalas e scientificas dal consorzi da scola a la scola chantunala dal Grischun. La fundaziun pussibilitescha da dumandar contribuziuns da terzas persunas che pon vegnir impundidas a favur da la fundaziun, p. ex. er per ils projects prevesids durant l'onn da giubileum. En quest connex na vegn il budget ordinari da la scola betg engrevgià.

Abolir la limitaziun dal dumber da peschs per il salmelin d'ual en tut ils lais
Da nov duai il salmelin d'ual pudair vegnir pestgà en tut ils lais en dumber illimità. La regenza ha revedì en quest senn las prescripziuns da pestga. Il salmelin d'ual exista en ils lais - en las auas currentas n'è quai betg il cas - en gronda spessezza da l'effectiv. Las prescripziuns da pestga revididas vegnan anc examindas da la confederaziun ed eventualmain approvadas.

Las taxas pauschalas dals servetschs psichiatrics vegnan auzadas
La regenza ha approvà las novas taxas pauschalas tranter ils servetschs psichiatrics dal Grischun e la federaziun Santésuisse. Las taxas pauschalas per pazients staziunars (acut, geronto, stabel, alcohol, drogas e partiziun da psicoterapia) sco er per ils pazients dal di e/u da la notg (clinica dal di 1 di, clinica dal di 1/2 di, mo pazients che dovran tgira) vegnan auzadas en media per 5,6 pertschient.

Da vischnancas e regiuns
- La regenza ha deliberà 190'000 francs per il project da la vischnanca da Mesauc "amplificaziun e renaturalisaziun da las construcziuns da rempar per la Moesa a San Bernardin". Ils custs totals muntan a 950'000 francs.
- La regenza ha approvà il project per la dustanza dal ual Bärental sin il terrritori da la vischnanca dal circul da Tavau. La contribuziun chantunala importa totalmain 495'000 francs.
- Medemamain ha la regenza approvà ils plans generals d'avertura "Lingias da construcziun", "Tavau Vitg" e "Tavau Plaz" dal circul da Tavau vischnanca.
- Las vischnancas Fuldera, Lü-Lüsai, Müstair, Sta. Maria V. M., Tschierv und Valchava èn sa fusiunads per il manschi communabel dal commerzi da laina ad ina corporaziun da vischnancas dal dretg public "Consorzi forestal Val Müstair" (CfVM). La regenza ha approvà ils statuts d'organisaziuns correspundents.
- Las votantas ed ils votants da Scuol han approvà il december 2002 la nova creaziun d'ina lescha davart l'incassament da las taxas da cura e da las contribuziuns per la promoziun dal turissem. La regenza ha approvà la lescha.

Contribuziuns chantunalas a differentas instituziuns
- Il club da skis da Pany, il club da skis ed il club da snowboard da Breil, il club da ballape da Domat ed il club da skis da St. Antönien survegnan per differents projects ina contribuziun da sport-toto da var 16'000 francs.
- Or dals meds da la lottaria naziunala interchantunala ha la regenza deliberà 7'500 francs per in nov center naziunal per fotografias a Winterthur.

Projects da vias
- Per lavurs vi dals sviaments Flem, Claustra e Saas sco er vi da la via dal Bernina (Punt Muragl-Puntraschigna) e da la A13 (surpassadi access Cuira nord) ha la regenza concedì credits en la dimensiun da var 3,4 milliuns francs.

Persunal
André Kraske, Tavau, è vegnì elegì sco collavuratur giuridic per il secretariat dal departament da l'intern e da l'economia publica.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun