Gea a la lescha per ina finanziaziun raschunaivla dals ospitals

En l'interess da las/dals pajataglias appellescha la regenza las votantas ed ils votants da deponer in persvadent gea en l'urna tar la lescha per ina finanziaziun raschunaivla dals ospitals che va en votaziun ils 9 da favrer 2003. Tut las 26 regenzas chantunalas e bunamain tut las cassas da malsauns sustegnan la lescha che concepescha la grevezza supplementara per ils chantuns, la quala è inevitabla, en furma supportabla. Uschia sa laschan evitar dispitas giuridicas sur onns cun cassas da malsauns e lur assicuradas/assicurads.

Il tribunal federal d'assicuranzas (TFA) ha concludì il november 2001 en ina decisiun da princip ch'ils chantuns n'hajan betg mo da sa participar als custs dals tractaments da l'ospital a la partiziun generala, mabain er dals tractaments a la partiziun mez-privata e privata dals ospitals publics. La lescha federala davart l'assicuranza da malsauns (LAM) n'aveva betg reglà cleramain questa dumonda. Las parts che n'èn betg vegnidas finanziadas dals chantuns enfin ussa gievan a quint da las assicuranzas supplementaras per tractaments mez-privats e privats.

A basa da la decisiun dal tribunal federal d'assicuranzas ha la pratica da finanziaziun existenta stuì vegnir curregida. Questa correctura ha per consequenza ina grevezza supplementara massiva per ils chantuns ed ina distgargia per las assicuranzas supplementaras per tractaments mez-privats e privats. Per cuntanscher ina midada transitoria reglada da questa dischlocaziun da la grevezza davent da las assicuranzas supplementaras a las/als pajataglias dals chantuns, han il cussegl naziunal ed il cussegl dals chantuns concludì il zercladur 2002 senza cuntravusch ina lescha federala urgenta. Questa lescha auza pass per pass la part da finanziaziun dals chantuns per tractaments a l'ospital da las persunas assicuradas mez-privatas e privatas en ospitals publics, ils quals èn er subvenziunads dal maun public, da 300 milliuns francs l'onn 2002 sin 500 milliuns francs l'onn 2004. Ils chantuns pajan uschia enfin l'onn 2004 totalmain 1,2 milliardas francs. Sche la lescha vegn refusada, s'augmenta questa part a passa 1,5 milliardas francs. En il chantun Grischun vegniss la refusaziun da la lescha ad engrevgiar las/ils pajataglias supplementarmain per var 7,5 milliuns francs.

La lescha federala urgenta è in cumpromiss coordinà vastamain ch'è vegnì accumpagnà d'ina cunvegnientscha extragiudiziala tranter ils chantuns e las cassas da malsauns. En il rom da questa cunvegnientscha han ils chantuns pajà il settember 2002 a las cassas da malsauns ina pauschala da 250 milliuns francs per l'onn 2001. L'ASSURA n'è betg entrada en questa cunvegnientscha ed ha ussa er inoltrà il referendum cunter la lescha federala urgenta.

Gremi: departament da giustia, polizia e sanitad
Funtauna: rg departament da giustia, polizia e sanitad