En il rom da la politica d'aglomeraziun da la confederaziun vegnan promovids models che megliereschan la collavuraziun en las aglomeraziuns. Per il spazi da Cuira e conturn è vegnì inoltrà l'atun 2002 tar l'uffizi federal da svilup dal terrirori (UFST) in project correspundent che vegn ussa sustegnì finanzialmain da la confederaziun. Uschia po cumenzar l'emprima fasa dal project.

Sco circumscrit en il plan directiv chantunal (PDChant 2000) cumpiglia il perimeter dal project la zona da la citad / l'aglomeraziun en la Val dal Rain ed en las valladas lateralas: el tanscha da Sargans enfin Tusaun sco er fin Glion, Lai, Arosa e Küblis (illustr. 1). La citad da Cuira, las regiuns da la Val dal Rain, la corporaziun da vischnancas Surselva, la regiun Viamala, la corporaziun regiunala dal Grischun central, la Pro Scanvetg, la Pro Partenz e la regiun da Sargans/Lai Rivaun sco er ils uffizis da planisaziun dals chantuns Grischun e Son Gagl sa participeschan correspundentamain a quest project. Il project da model s'orientescha a las ponderaziuns directivas dal PDChant 2000.
En l'emprima fasa dal project (2003) vegnan intercuridas las relaziuns territorialas en questa regiun. En quest connex vegnan tractads temas sco traffic, economia, recreaziun, cultura sco er las qualitads e qualificaziuns dal spazi per differentas activitads. Il medem mumemt vegn sviluppada ina furma d'organisaziun adattada per incumbensas che sa derasan sur las regiuns ed il chantun ora ed elavurà in tema d'approfundaziun adattà per ina segunada fasa. En la segunda fasa (2004) vegn tractà il tema d'approfundaziun anc betg fixà, e la furma d'organisaziun vegn consolidada ed examinada. En il project è la collavuraziun tranter las differentas instituziuns ed ils differents acturs fitg impurtanta. I vegn lavurà cun enquistas ed ils resultats vegnan preschentads e sviluppads en workshops.
Cun il project da model vul ins sa preparar ad ura per il program d'aglomeraziun. In tal vegn pretendì da la confederaziun ca. davent dal 2006 spezialmain per garantir ils meds federals per l'infrastructura en il traffic da l'aglomeraziun. Eventualmain mainan ils pli impurtants resultats da quest program ad in'adattaziun dal PDChant 2000. Sumegliants projects ed in proceder analog fissan adattads er per ulteriurs territoris urbans dal chantun, numnadamain en la regiun da Tavau, en l'Engiadin'auta ed en la Mesolcina bassa (cf. illustr. 2). En tschertas regiuns èn gia vegnidas instradadas examinaziuns preliminaras.

Links:
- Illustraziun I (pdf)
- Illustraziun II (zip)

Gremi: Uffizi da planisaziun
Funtauna: Uffizi da planisaziun