La biblioteca chantunala e la rait da bibliotecas dal Grischun survegnan in nov sistem da EED: a Pasca duain vegnir transferidas las datas ch'èn vegnidas preparadas da nov en il sistem "Aleph". La biblioteca chantunala da Son Gagl surpiglia la gestiun. Questa soluziun porta avantatgs a domaduas varts.

La rait da bibliotecas dal Grischun consista da 22 bibliotecas cun 290'000 titels registrads che pon er vegnir clamads giu en l'internet dapi bainbaud trais onns. Cun il midament da generaziun tar la software duai er vegnir stabilida la collavuraziun aifer quella rait sin ils standards actuals. In contract da servetsch cun la rait d'infurmaziun da la Svizra tudestga (CIS) instradescha il barat cun las regiuns da bibliotecas cunfinantas.

L'unificaziun creschenta porta avantatgs considerabels a bibliotecas ed a la clientella. Il pli nov exempel: il BibliOpass svizzer pussibilitescha dapi il december da l'onn passà l'access a 600 bibliotecas en tut la Svizra. A la rait da bibliotecas dal Grischun facilitescha la standardisaziun per entant la collavuraziun cun la biblioteca chantunala da Son Gagl. La rait da bibliotecas da Son Gagl e la rait da bibliotecas dal Grischun vegnan a funcziunar en l'avegnir sur il medem server a Son Gagl. Dal contract stipulà avant pauc temp profiteschan domaduas varts: Son Gagl da l'effect sinergetic, il Grischun dal know-how d'aleph che Son Gagl ha stabilì en ils onns passads.

Adressas d'internet:
- Biblioteca chantunala dal Grischun: http://kbchur.gr.ch
- Rait d'infurmaziun da la Svizra tudestga: http://www.zb3.unizh.ch/ids/
- Rait d'emprest da las bibliotecas svizras: http://www.bibliopass.ch

Gremi: biblioteca chantunala
Funtauna: rg biblioteca chantunala