Ils projects da l'Expo. 02 dal chantun Grischun "aua extrema" ed il
"di chantunal" èn istorgia. Sco regurdientscha, en spezial al di
chantunal dal Grischun a Neuchâtel, ha Andrea Badrutt realisà in cudesch
illustrà.
Il graficher e fotograf da Cuira Andrea Badrutt ha concepì
quest'ovra da 80 paginas davart il di chantunal dal Grischun en moda
zunt viva. L'eveniment da la cumparsa grischuna ils 31 d'avust 2002 a
l'Expo.02 reviva uschia danovamain.
"In eveniment extraordinari"
Cusseglier guvernativ Klaus Huber ha valità l'exposiziun naziunala
sco "eveniment extraordinari". La pussaivladad da sa scuntrar e far
patratgs davart il temp preschent e futur da noss pajais è ina valur
impurtanta da quest'exposiziun. Huber ha menziunà il grond success da
"aua extrema" sco project communabel dals chantuns da la Svizra
orientala Glaruna, Schaffusa, ils dus Appenzell, Son Gagl, Turgovia e
Grischun. Cun var in milliun visitadras e visitaders è il pavigliun da
la Svizra orientala stà in dals eveniments visitads il meglier da
l'entira Expo.02. Il tema aua è stà adattà perfetgamain per "la chombra
d'aua dal Grischun" cun sia ritgezza d'aua (forza idraulica, aua
minerala, bogns termals, naiv, glatschers sco er flums e lais).
Il motto ch'è vegnì tschernì per il di chantunal "Grischun natiral e
colurà" ha pudì vegnir realisà fitg bain cun il program da basa
cultural, il "culinarium" e cun ils 211 capricorns colurads. En il medem
mument ha la marca "Grischun" reussì a chaschun da l'emprima cumparsa en
la publicitad. Sa legrà ha Huber davart la gronda participaziun da las
Grischunas e dals Grischuns a Neuchâtel e davart la cordialitad da la
preschentaziun grischuna. Per el è quest cudesch illustrà ina bella
regurdientscha, ina perditga da temp e l'istorgia d'in di spezial,
durant il qual il Grischun ha visità l'Expo.02.
1200 scolaras e scolars han cooperà
Per il manader da project Beat Ryffel conferma il cudesch
commemorativ che las finamiras dal project èn vegnidas cuntanschidas.
Cun il di chantunal dal Grischun è vegnì mess a l'Expo.02 in segn
positiv sur il cunfin dal chantun ora. La delegaziun dal Grischun, las
cunviagiaturas ed ils cunviagiaturs, las numerusas Grischunas en
encreschadetgna, ils numerus Grischuns en encreschadetgna sco er las
visitadras ed ils visitaders han vivì in program attractiv. Gia il fatg
ch'igl è reussì da motivar tut las vischnancas dal Grischun a colurar
ils capricorns pon ins vesair sco success. Per las/ils var 1200
scolaras/scolars èsi franc in plaschair da pudair admirar lur art da
malegiar en in cudesch plain vita.
Ord puntg da vista dal chantun èsi spezialmain plaschaivel ch'il rom
da finanzas è vegnì observà. Il success è mo stà pussaivel grazia ad in
team motivà, numnadamain al coordinatur dal project Christian Durisch, a
l'agentura da reclama GGS cun Sandro Gämperle, a Grischun vacanzas, al
sculptur d'objects da lain Daniel Cotti ed al team responsabel per
colurar cun Hubert Bezzola e Tommaso Zendralli. Cusseglier guvernativ
Klaus Huber ed il manader da project Beat Ryffel han er undrà las
furmaziuns, organisaziuns, interpresas, ils sponsurs, las gidantras ed
ils gidanters per lur engaschament cun success a l'Expo.02.
Las mattatschas ed ils mattatschs ch'avevan gia accumpagnà la
delegaziun grischuna a chaschun dal di chantunal han surdà ils emprims
exemplars dal nov cudesch illustrà a cusseglier guvernativ Klaus Huber,
al manader artistic Hubert Bezzola, ad Erika Engler da "Danse Verticale"
ed al cabarettist Rolf Schmid. Cun quai è il project "Expo.02 di
chantunal dal Grischun" definitivamain "istorgia".
Gremi: departament da l'intern e da l'economia publica
Funtauna: rg departament da l'intern e da l'economia publica