En l'onn idrologic 2001/2002 èsi vegnì consumà en Grischun 1780 milliuns uras kilowat energia. Quai è, cumpareglià cun la perioda da l'onn passà, in lev augment da ca. 0,3 pertschient. La producziun d'energia da l'onn 2002, cun 7366 milliuns uras kilowatt, è percunter per ca. tschintg pertschient pli bassa che la media da blers onns.

Las ovras electricas dal Grischun annunzian mintg'onn lur consum d'electricitad a l'uffizi d'energia. La statistica che l'uffizi d'energia ha elavurà mussa ch'il consum registrà en il Grischun en la davosa perioda 2001/2002 (october 2001 fin settember 2002) è s'augmentà levamain cumpareglià cun la perioda da l'onn passà.

Differenzas tar las gruppas da consum
Sch'ins guarda las singulas gruppas da consum munta l'augment da consum en il sectur da las chasadas, dal mastergn, da l'agricultura e da las prestaziuns da servetschs be ca. a 0,1 pertschient. En il sectur da las viafiers (VR, VFF, FO) è stà l'augment var sis pertschient. Quel è resultà principalmain perquai che las VFF han registrà in augment dal consum d'energia. Tar la VR è il consum sa sminuì in pau pervia las interrupziuns dals trajects per consequenza da las malauras.

Tar l'industria gronda è il consum d'energia perfin sa sminuì per ca. tschintg pertschient. Quella sminuziun deriva essenzialmain dal fatg che las ovras da plattas pressadas a Fideris èn serradas e perquai che l'efficienza è s'augmentada.

La producziun d'electricitad
La producziun da las ovras idraulicas dal Grischun è stada l'onn 2002 cun 7366 milliuns uras kilowat tschintg pertschient sut la media da blers onns. Cumpareglià cun l'onn 2001 ch'è stà in onn cun fitg blera plievgia èn stadas las precipitaziuns da l'onn passà levamain sut la media. Quai ha consequentamain effectuà ina pli pitschna producziun d'energia.

Rinviament:
Ina grafica davart il consum e la producziun d'electricitad chattais Vus sut www.energie.gr.ch ? statistica.

Gremi: Uffizi d'energia
Funtauna: Uffizi d'energia