Avant 10 onns è entrada en vigur la lescha actuala davart l'agid a victimas LAV. La proxima revisiun totala prevesa oravant tut d'eliminar mancanzas actualas en connex cun la satisfacziun (contribuziuns maximalas) e cun l'agid a victimas suenter in delict a l'ester ed en connex cun las contribuziuns federalas. La regenza grischuna sustegna da princip las propostas da midada. En la consultaziun a l'uffizi federal da giustia s'engascha ella però oravant tut per che la confederaziun s'engaschia finanzialmain pli ferm en il futur. L'agid a victimas è ina incumbensa cuminaivla da la confederaziun e dals chantuns ed ils chantuns vegnan obligads en quel rom da porscher e da finanziar diversas prestaziuns; uschia il manaschament da posts da cussegliaziun ed il pajament da satisfacziun e d'indemnisaziun. Plinavant prescriva la confederaziun la tscherna libra dal post da cussegliaziun senza stuair surpigliar las consequenzas finanzialas per quai.

Gea di la regenza a la cussegliaziun, na però a l'indemnisaziun da victimas e da lur confamigliars pertutgads, sch'il delict è capità a l'ester. La cussegliaziun duai senz'auter vegnir concedida independentamain dal lieu dal delict, l'agid però betg, perquai che la Svizra n'ha nagin'influenza sin la segirtad interna da stadis esters.

La regenza è perencletga cun la procedura da consultaziun pli rigurusa da la confederaziun
La regenza sustegna la nova regulaziun giuridica davart la procedura da consultaziun da la confederaziun. La procedura duai vegnir optimada, essenzialisada e sustegnida intenziunadamain dals novs meds da communicaziun e d'infurmaziun. Plinavant vul la chanzlia federala stgaffir dapi transparenza tar las singulas proceduras da consultaziun. La qualitad da questa part impurtanta da la procedura legislativa vegnia augmentada uschia, scriva la regenza en sia consultaziun davart la revisiun da la lescha davart l'organisaziun da la regenza e da l'administraziun LORA.

La decleraziun obligatoria dals pretschs per dentists è incontestada
Pretschs en francs e raps empè dal sistem da puncts da taxa: La regenza sustegna la midada correspundenta da la "ordinaziun davart la publicaziun dals pretschs" per prestaziuns da servetsch dals dentists. Uschia vegnan ils dentists obligads da declerar avertamain ils pretschs per lur prestaziuns da servetsch.

Medemamain en moda positiva vesa la regenza l'infurmaziun da pretschs clera per servetschs da plivalur, ils uschenumnads servetschs d'infurmaziun e da commerzialisaziun, en il sectur da la telefonia. Tenor il nov sboz d'ordinaziun duain las consumentas ed ils consuments alura vegnir infurmads obligatoriamain sch'il servetsch giavischà custa dapli che dus francs a la minuta. La regenza propona qua da sbassar quella limita sin in franc a la minuta.

Da vischnancas e regiuns
- La revisiun parziala da la constituziun communala da Flem po entrar en vigur. La regenza ha approvà la midada dals artitgels 17 e 18 (las cumpetenzas da la vischnanca da votantas e votants en connex cun votaziuns materialas resp. las cumpetenzas da la radunanza communala en connex cun la vendita d'immobiglias e bains immobigliars).
- La regenza ha approvà las mesiras d'urgenza en connex cun la revisiun totala davart la planisaziun locala da la citad da Cuira: midadas da la lescha da construcziun, plan general da la midada dal plan da zonas, plans generals da furmaziun "Sand" e "Deponie Geissweid".
- La vischnanca da Puntraschigna dastga manar sia scola en moda bilingua a partir da l'onn da scola 2003/04. Quel concept è vegnì approvà unanimamain da las votantas e dals votants ils 18 da mars; la regenza è ussa er s'exprimida en chaussa en moda positiva.

Contribuziuns chantunalas a differentas instituziuns
- La regenza ha concedì credits d'agid d'investiziun per trais projects: a la Park Hotels Waldhaus SA a Flem per la construcziun d'ina nova zona da wellness, a la vischnanca da Tumegl per il negozi dal vitg en il rom da la nova construcziun da la chasa da mastergn Curschiglias ed a la vischnanca da Ftan per in indriz da televisiun a cabel.
- Per il sectur da la promoziun da la cultura ha la regenza deliberà las suandantas contribuziuns:
- 18 ovras resp. occurrenzas culturalas survegnan dal chantun ina garanzia da deficit da totalmain 134'000 francs;
- l'orchester da chombra dal Grischun survegn l'onn 2003 ina contribuziun da var 86'000 francs;
- il comité d'organisaziun "200 onns Haldenstein" survegn per l'organisaziun e la realisaziun da lur festa in sustegn unic da 30'000 francs.
- Per il sectur da la tgira da monuments ha la regenza deliberà otg contribuziuns da totalmain var 3 milliuns francs.

Projects da vias
- Per var 6,7 milliuns francs ha la regenza approvà projects da via en il sectur dal sviament da Saas, da la via dal Güglia (Savognin, Crap Sès), da la A13 (colliaziun Landquart ost), da la via da l'Engiadina (chavorgia da l'En Charnadüra, Ruinains/Tschlin).
- Sin la via da colliaziun chantunala tranter Sevgein-Riein, spartavias Via da la Surselva - Sevgein/Curschetta pon ins da nov charrar cun in pais maximal da 28 tonnas (fin ussa 18) ed ina largezza maximala da 2,55 meters (fin ussa 2,3); sin il traject Sevgein/Curschetta-Val da Raclein pon ins charrar tut tenor la cumplettaziun cuntinuanta da nov cun 18 tonnas (fin ussa 13).

Persunal
La nova scheffa da l'uffizi da cultura ha num Flavia Kippele. Ella entschaiva sia nova plazza il 1. da settember. Flavia Kippele è dapi il schaner 1998 manadra da fatschenta da la Pro Senectute dal Grischun. Ella ha fatg il doctorat a l'universitad da Turitg ed ha absolvì ultra da quai la furmaziun per il "Bachelor of Business Administration".

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun