Il pli nov numer da la revista "Forum - bibliotecas dal Grischun" e
cumparì ils 8-4-03. L'emprim forum da l'onn orientescha mintgamai
detagliadamain davart la rait da bibliotecas chantunalas. El cuntegna
ils rapports annuals d'ina gronda part da las bibliotecas dal Grischun,
la statistica annuala, la purschida da scolaziun e perfecziunament sco
er ulteriuras infurmaziuns da l'associaziun.
leger.GR - Giuventetgna e medias Grischun (leger. GR - GMG):
L'associaziun leger.GR - Giuventetgna e medias Grischun (pli baud
cuminanza da lavur grischuna da cudeschs per la giuventetgna BAJ) exista
dapi l'onn 1962 ed ha stgars 1'000 commembras e commembers. L'incumbensa
da l'associaziun cumpiglia tenor il "mussavia bibliotecas dal Grischun"
il sustegn da las bibliotecas cun projects adattads che promovan il
leger sco er la promoziun da las bibliotecas en general tras lavur
publica. Uschia organisescha leger.GR - GMG per exempel la seduta
annuala da las bibliotecaras e dals bibliotecars dal Grischun u
iniziescha e realisescha tranter auter lecturas d'auturas ed auturs en
scolas.
Sco commembras e commembers fan part a l'associaziun persunas
privatas, persunas d'instrucziun, bibliotecas, scolas u vischnancas
e.u.v. A chaschun da la radunanza generala da l'associaziun da quest onn
èsi vegnì concludì da sa participar a la fundaziun per medias d'uffants
e da giuvenils en Svizra per pudair profundar tras la colliaziun a
questa organisaziun tetgala naziunala la collavuraziun surregiunala e
per pudair profitar da las enconuschientschas e da la varietad d'ideas.
Rapports annuals:
Ils 52 rapports annuals ch'èn vegnids publitgads reflecteschan fitg
bain la scena colurada da las bibliotecas grischunas. Lien chattan ins
descripziuns da puncts culminants da l'onn, introducziuns da novas
medias, sco per exempel DVDs, cumposiziuns dals teams, renovaziuns ed
engrondiments da locals da bibliotecas e.u.v.
Els mussan però er la varietad da las bibliotecas areguard il tip e
la grondezza. Represchentadas èn las bibliotecas da scola e da
vischnanca, però er la biblioteca chantunala, la biblioteca populara dal
Grischun u la biblioteca da pazients da l'ospital chantunal a Cuira.
Correspundent a l'intschess cumpiglià da las bibliotecas èn ils texts
redigids per tudestg, rumantsch u talian.
Statistica:
La statistica da biblioteca reflectescha la situaziun da las
bibliotecas chantunalas.
- Da questas 80 bibliotecas che mussan lur cifras, furman las
bibliotecas da scola e da vischnanca e las bibliotecas en cumbinaziun da
scola e vischnanca cun 54 represchentants la pli gronda gruppa.
- Questa gruppa da bibliotecas pussibilitescha a 92'000 abitantas ed
abitants dal chantun, pia a la mesadad da la populaziun, in access
manaivel a 356'000 medias, da las qualas 32'000 èn nonbooks.
- Perquai ch'ellas vegnan manadas da bibliotecaras activas cun grond
interess n'èsi betg da smirvegliar che l'onn passà èn vegnidas
emprestadas 608'000 medias, da quellas 147'000 nonbooks.
Las bibliotecas da scola e da vischnanca èn d'ina vart il center
d'infurmaziun da la vischnanca e savens er prest il davos lieu da
scuntrada per creschids e giuvenils, essend che las fatschentas, la
posta e la banca scumparan adina dapli or da la vischnanca.
- La part da las novas medias sco DVDs e DCs crescha permantamain en
las bibliotecas. Questas medias èn il hit d'emprest.
- Ils custs da manaschi da statistica da questas 54 bibliotecas da
scola e da vischnanca muntan a totalmain 2 milliuns francs. Da quai vegn
dada or l'ina mesadad per material da biblioteca, fit da las localitads
ed acquisiziuns novas e l'autra mesadad per las/ils 302 bibliotecaras e
bibliotecars. Sch'ins quinta mo cun in temp da lavur da 4 uras per
emna/persuna resulta ordlonder ina paja per ura da fr. 17. Las
collavuraturas ed ils collavuraturs da las bibliotecas da scola e da
vischnanca sustegnan la vita da vischnanca cun grond engaschament e
pitschen salari.
Scolaziun:
Il Grischun è stà in dals emprims chantuns ch'ha purschì curs da
biblioteca tenor las directivas da la CLP (Cuminanza da lavur da las
bibliotecas svizras da lectura publica). Avant diesch onns ha leger.GR -
Giuventetgna e medias Grischun (da lez temp cuminanza da lavur grischuna
da cudeschs per la giuventetgna, BAJ) organisà sut la direcziun d'Agnes
Egli l'emprim curs da scolaziun. Dapi l'onn 2000 ha il Grischun in nov
concept da scolaziun. Ils curs da furmaziun da creschids, ils quals sa
sutdividan en in curs da basa, in curs da direcziun e curs da furmaziun
supplementara, vegnan organisads da l'incaricada da biblioteca Nelly
Däscher en incumbensa da la cumissiun da bibliotecas dal chantun. Var
150 bibliotecaras e bibliotecars han terminà durant quest temp il curs
da basa cun success. Avant dus onns han ins pudì realisar per l'emprima
giada in curs da direcziun cun 21 participantas e participants. Las
bibliotecaras ed ils bibliotecars èn fitg interessads a scolaziun e
perfecziunament. Mintg'onn visitan var 170 participantas e participants
ils curs da scolaziun supplementara, ils quals èn organisads a posta per
els. Cun ils differents curs pon ins cuntanscher che las bibliotecas da
scola e da vischnanca en il chantun vegnan manadas professiunalmain
tenor las pli novas directivas e normas svizras e ch'ellas han in aut
standard.
Gremi: Associaziun leger.GR
Funtauna: rg Associaziun leger.GR