Mardi, ils 27 da matg 2003 ha lieu la festa da finiziun da las otg bibliotecaras novas CLP (Cuminanza da lavur da las bibliotecas svizras da lectura publica). Ellas survegnan in certificat che qualifitgescha ellas sco collavuraturas da biblioteca per bibliotecas da scola e communalas. Il medem temp festivescha questa scolaziun ses giubileum da diesch onns.

Suenter ina scolaziun da bibliotecara d'in mez onn e suenter in examen final en las premissas da las differentas lavurs da biblioteca, pon tut las otg participantas dal curs fundamental en il Grischun retschaiver il certificat CLP sco collavuratura da biblioteca.

Avant diesch onns ha leger.GR - Giuventetgna e medias Grischun (da lez temp cuminanza da lavur grischuna da cudeschs per la giuventetgna, BAJ) organisà l'emprim curs da scolaziun. Dapi l'onn 2000 ha il chantun Grischun in nov concept da scolaziun. La scolaziun da bibliotecaras vegn purschida da la cumissiun chantunala da biblioteca. Il curs fundamental CLP entschaiva mintgamai il settember e terminescha il matg cun in examen final.

Per fortuna sa mussi suenter 10 onns scolaziun che quest curs fundamental CLP è anc adina fitg dumandà ed apprezià. A las collavuraturas da biblioteca ed a las bibliotecas da scola e communalas dat el ina basa da lavur impurtanta e sustegna la rait "bibliotecas dal Grischun".

In certificat survegnan:
Barbara Bernhard, Maiavilla ; Ruth Bezzola, Samedan ; Vreni Caduff, Cuira ; Susanne Casal, Cuira ; Annemarie Clavadetscher-Tobler, Malans ; Marianne Fanchini, Luchsingen ; Natalina Robustelli, Cuira ; Regula Zahner, Schiers

Gremi: Biblioteca chantunala
Funtauna: rg Biblioteca chantunala