L'imposiziun da taglia sin conjugals e sin famiglias vegn revedida actualmain sin stgalim federal. Ils detagls tar las deducziuns da l'assicuranza da malsauns ch'èn vegnidas decididas e tar las deducziuns da tgira d'uffants tar la taglia federala directa vegnan fixadas en duas ordinaziuns tras il cussegl federal. Sco deducziun da l'assicuranza da malsauns vala la premia da media quintada sco pauschala al lieu da taxaziun il di da tagl 31-12 minus la reducziun da premia pajadà effectivamain durant la perioda da taglia. En sia posiziun per mauns da l'administraziun federala crititgescha la regenza grischuna che la deducziun da l'assicuranza da malsauns possia violar il princip da "l'imposiziun da taglia tenor la prestaziun finanziala". Quest problem sa manifestescha en spezial tar ina midada d'in chantun cun ina fitg auta premia da media en in chantun cun ina fitg bassa premia da media. Per quai pretenda la regenza ina soluziun pratitgabla ed adequata.
Las deducziuns da tgira d'uffants duain er esser alura pussaivlas, sch'ils geniturs èn pervia da l'incapacitad da gudagnar e scolaziun dependents dal sustegn da terzas persunas. Surpiglian però commembers da la famiglia la tgira d'uffants en cas da malsogna u accident, na duain deducziuns betg esser pussaivlas. Sut "famiglia" chapescha la regenza grischuna la lingia directa da parents dals conjugals sco er ils fragliuns.

L'ordinaziun davart la taglia d'exemziun dal servetsch militar è da princip vegnida acceptada
La lescha federala davart la taglia d'exemziun dal servetsch militar è vegnida deliberada dal parlament l'october 2002. L'ordinaziun latiers sa chatta actualmain en consultaziun. La regenza grischuna sustegna da princip il sboz da l'ordinaziun. La regenza crititgescha sulettamain l'intenziun da debitar tar in pajament parzial da la taglia d'exemziun dal servetsch militar ils custs d'administraziun (taxas e custs, p.ex. tar ina scussiun) pir suenter eventuals chastis e suenter la taxa da cumpensaziun effectiva. Ils custs en il chantun na giustifitgeschan nagina midada da l'artitgel concernent.

La classa da tscherna da professiun dal circul da Tavau è approvada definitivamain
Dapi l'onn da scola 2000/2001 vegn manada en la scola professiunal dal circul da Tavau ina classa da tscherna da professiun. Per onn han profità en media 16 scolaras e scolars da las regiuns Tavau, Partenz e Val d'Alvra da questa purschida da furmaziun. Suenter l'onn da tscherna da professiun han las absolventas ed ils absolvents chattà per il solit senza problems ina plazza d'emprendissadi u l'access a scolas da cuntinuaziun. La regenza ha ussa acceptà definitivamain la classa da tscherna da professiun dal circul da Tavau.

Meglra collavuraziun en il sectur "martgà da lavur"
Uffizis ch'èn activs en il sectur dal martgà da lavur duain tschertgar ina meglra collavuraziun. En il rom da l'uschenumnà project davart la collavuraziun interinstituziunala IIC èn s'unids en il Grischun l'uffizi per industria, mastergn e lavur UCIML, l'uffizi dal servetsch social, l'uffizi per la furmaziun professiunala e la cussegliaziun professiunala sco er l'institut d'assicuranza sociala. La regenza ha approvà ils puncts centrals dal project IIC, la direcziun communabla da cas e la preparaziun da mesiras en il martgà da lavur. Ussa vegnan involvids ils posts exteriurs regiunals dals uffizis e la realisaziun vegn discussiunada al lieu.

Da vischnancas e regiuns
- Per midadas da construcziun vi da la chasa da scola d'Ardez ha la regenza approvà ina summa da construcziun maximala da var 46'000 francs. Ils custs totals muntan a var 260'000 francs. La regenza ha medemamain approvà definitivamain il project da construcziun per la midada dal center da scolaziun e furmaziun Rosengarten a Cuira. Ella ha garantì ina contribuziun da construcziun da var 400'000 francs.
- La regenza ha approvà la revisiun dals statuts da l'Uniùn da scola / scoleta Muntogna da Schons. Il dumber da las commembras e dals commembers dal cussegl da scola, da nov senza suppleants, è vegnì reducì da set a tschintg. Ultra da quai èn ils statuts vegnids adattads a la situaziun nova suenter la fusiun da las vischnancas da Donat e Pazen-Farden.
- La planisaziun locala revedida per part (lescha da construcziun, plan da zonas territori "Puoz" sco er il plan da zonas ed il plan general da furmaziun dal territori "Lingia") da Valchava è - suenter la radunanza communala dal favrer 2003 - ussa er vegnida approvada da la regenza.

Contribuziuns chantunalas a differentas instituziuns
- Er las vischnancas da Schluein e da Pigniu èn vidlonder da reparar ils donns suenter las malauras 2002. Per tuts dus projects intergrals ha la regenza approvà totalmain var 258'000 francs.
- L'infrastructura (lingia da colliaziun per aua da baiver e distribuziun d'aua da baiver cun lingias d'idrants) da la fracziun Sclamischot da la vischnanca da Tschlin vegn renovada. La contribuziun chantunala persuenter munta a var 110'000 francs.
- Per l'infrastructura persunala ed administrativa da l'intermediaziun grischuna da muvel SA ha la regenza concludì per l'onn 2003 in'indemnisaziun pauschala da 100'000 francs.

Projects da vias
- Per projects da vias sin la via da Stussavgia (Türlihus-Arezen), sin la via dal Fuorn (Plaun dals Bovs-Votas) e sin la via da Partenz (dustanza Arieschbach) èn vegnids approvads var 1,4 milliuns francs.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun