La regenza ha deliberà per la consultaziun il project per la nova lescha davart la planisaziun dal territori per il chantun Grischun (LPT). Vischnancas, regiuns e persunas interessadas èn envidadas da prender posiziun fin la mesadad d'october 2003.

La lescha vertenta davart la planisaziun dal territori per il chantun Grischun deriva en general da l'onn 1973. Suenter 30 onns duai ella ussa vegnir rinfrestgada e substituida d'ina nova lescha. Latiers sa tracti surtut d'ina nova concepziun areguard la lingua e la sistematica sco er d'ina sgumbraziun da normas surpassadas. In basegn da revisiun exista er areguard las experientschas praticas cun il dretg vertent ch'ins ha fatg en ils trais decennis passads e pervi dal dretg surordinà modifitgà.

Proceduras pli simplas e pli sveltas
A medem temp cun la rinfrestgada tschenta il project er divers accents. L'accent principal è la simplificaziun e l'acceleraziun da las diversas proceduras da planisaziun e da permissiun. Sco mesira stattan latiers a disposiziun tranter auter l'introducziun da termins da liquidaziun, l'unificaziun da las prescripziuns da procedura, la meglieraziun da la coordinaziun da procedura e l'armonisaziun dals meds legals. Ulteriurs accents dal project èn l'engrondiment da la libertad d'agir da las vischnancas en dumondas da la planisaziun locala, l'introducziun dal princip "abitar resta abitar" tar edifizis ordaifer la zona da construcziun, la creaziun d'in urden da cumpetenzas pli cler per chastiar activitads da construcziun illegalas, la realisaziun da las novas normas federalas per construir tenor ils basegns da las persunas impedidas sco er refurmas per promover ina buna qualitad d'abitadi e d'architectura.

Nagina nov'invenziun da la planisaziun dal territori
Il project n'ha ni en mira ina nov'invenziun da la planisaziun dal territori ni chaschuna ella per se ina nova unda da revisiuns da la planisaziun locala. Anzi, las meglieraziuns prevesidas sa basan sin ils stgalims da la planisaziun dal territori cumprovads ed enconuschents (planisaziun directiva-planisaziun d'utilisaziun-procedura per la permissiun da construcziun). Gist uschè pauc vegn scurlattà vi da l'autonomia grischuna da las vischnancas tar ils fatgs da construcziun e da planisaziun ch'è tradiziunalmain auta. Cun quai ch'il project porta cleras unificaziuns en il sectur formal, sa pon concentrar las vischnancas en il futur perfin anc dapli sin quai ch'è essenzial per l'autonomia da las vischnancas or dal puntg da vista politic e real.


Gremi: regenza
Funtauna: rg departament da l'intern e da l'economia publica