La regenza vegn a suttametter en la sessiun d'october 2004 al cussegl grond in sboz per la revisiun parziala da la lescha chantunala da scolina, da la lescha chantunala da scola sco er da l'ordinaziun davart la salarisaziun da las persunas d'instrucziun. La cumissiun permanenta per furmaziun e cultura dal cussegl grond ha - manada dal vicepresident Livio Zanolari - predeliberà la missiva respectiva da la regenza en sia sesida dals 10 da settember 2004 per mauns dal cussegl grond. Er cussegliera guvernativa Eveline Widmer-Schlumpf e cusseglier guvernativ Claudio Lardi èn stads preschents a quella sesida.

Il punct principal da la revisiun è la fixaziun da la salarisaziun minimala da las persunas d'instrucziun da la scola populara e da la scolina. Plinavant duai vegnir concedida al cussegl grond la cumpetenza da reducir u d'augmentar annualmain las contribuziuns pauschalas ch'èn decisivas per las subvenziuns, e quai per maximalmain tschintg pertschient, totalmain per maximalmain diesch pertschient. Ultra da quai vegn fixà en la lescha da scolina ed en la lescha da scola in rom areguard la salarisaziun minimala sco er areguard las summas pauschalas ch'existan per ils subvenziunaments; entaifer quest rom vegn il cussegl grond explicitamain autorisà da concretisar las tariffas correspundentas sin il stgalim da l'ordinaziun. Ultra da quai vegn midada la regulaziun da la durada da las lecziuns en la scola populara ed il pensum obligatori per emna da las persunas d'instrucziun da la scolina vegn circumscrit en moda pli precisa.

En moda cuntraversa è vegnida discutada spezialmain l'adattaziun da la salarisaziun minimala da las persunas d'instrucziun da la scolina sco che quella vegn previsa da la regenza en la missiva. Cuntrari a l'augment da quatter pertschient, sco quai che la regenza ha proponì, pretenda la maioritad da la cumissiun in augment da sis pertschient. Areguard la durada da las lecziuns en la scola populara propona la cumissiun ina formulaziun che s'orientescha a la regulaziun vertenta e che parta da lecziuns che duran 50 minutas; en cas motivads po il cussegl da scola divergiar da questa regulaziun.
Suenter avair tractà intensivamain il project ha la cumissiun deliberà unanimamain la missiva da la regenza per mauns dal cussegl grond.

Gremi: cumissiun per furmaziun e cultura dal cussegl grond
Funtauna: rg cumissiun per furmaziun e cultura dal cussegl grond