LA NOVA AVERTURA DA BASA EN IL PLAN DIRECTIV È CONCLUDIDA
Il territori da skis da Zuoz ha in basegn considerabel d'innovaziun. Ils runals a staffa ch'èn en funcziun na correspundan betg pli a las pretensiuns d'ozendi, e quai pertutgant la capacitad ed il confort. Er las planisaziuns da la vischnanca da Zuoz che sa refereschan als svilups en il center dal vitg, particularmain la distgargia dal center dal vitg dal traffic motorisà, pretendan ina nova avertura da basa dal territori da skis da Zuoz.
En il plan directiv chantunal è vegnida concludida dal departament da l'intern e da l'economia publica ils 24 da settember 2004 en la procedura simplifitgada la fixaziun da la nova avertura da basa dal territori da skis da Zuoz. Uschia è vegnida creada ina premissa impurtanta per cuntinuar cun il manaschi dal territori da skis da Zuoz. La basa per l'adattaziun dal plan directiv è vegnida elavurada en in process da cooperaziun tranter la vischnanca, la regiun, l'interpresa, las organisaziuns per l'ambient ed ils posts da servetsch chantunals pertutgads. En il rom da la procedura d'audienza e da la procedura d'examinaziun èn la confederaziun, il chantun e la vischnanca s'exprimids positivamain. Cun l'adattaziun dal plan directiv vegn remplazzada la varianta veglia "Champatsch" - tar la quala igl era vegnì inoltrà recurs encunter la revisiun da la planisaziun locala e cunter la runcada - tras la varianta nova "Chastlatsch".
La staziun da val da la nova sutgera è previsa sur la via chantunala veglia tranter il santeri e la zona d'abitar Crasta. La staziun da muntogna sa chatta diagonalmain al vest, sur la staziun da val dal runal Pizzet. I duai vegnir realisada ina sutgera da quatter cun sutgas installadas fix. La stad n'è la sutgera betg en funcziun, durant quest temp vegnan demontadas las sutgas. Tar la staziun da muntogna èn planisads la plazza da rimnada ed il territori d'exercizi per ils principiants da la scola da skis. Cun metter en funcziun il nov indriz vegn eliminà er l'access tras il center dal vitg e tras las giassas stretgas da Zuoz.
A medem temp cun la nova sutgera "Chastlatsch" duai vegnir remplazzà er il runal a staffa da Pizzet tras ina sutgera confortabla. Igl è previs da cumenzar cun la construcziun dals novs implants l'onn proxim. D'als metter en funcziun è planisà per la stagiun d'enviern 2005.
Il nov implant d'apport n'ha nagin effect che pregiuditgescha in'eventuala avertura futura da la val Viroula. Il plan a lunga vista da l'interpresa sutgeras e runals Zuoz SA mussa ch'ina avertura da la val Viroula n'ha ils proxims diesch onns nagina prioritad. Perquai ha pudì vegnir fixà en il plan directiv in moratori da 10 onns per in'eventuala avertura da la val Viroula.
Persunas che dattan infurmaziuns:
- UP, Richard Atzmüller, manader da partiziun plan directiv e basas, 081 257 23 37
- Heinz Masüger, president communal da Zuoz, 081 854 13 43
Funtauna: Uffizi da planisaziun