La cumissiun permanenta per furmaziun e cultura ha tractà la missiva da la regenza tar ina revisiun totala da la lescha davart la scola auta professiunala da pedagogia (LSAP) sco er tar il relasch d'ina lescha davart la scola auta da tecnica ed economia (LSATE). La cumissiun propona unanimamain al cussegl grond d'entrar en il project e d'approvar la fatschenta cun propostas da midada. La cumissiun stat sut il presidi dal deputà al cussegl grond Martin Butzerin, a la seduta da cumissiun ha er il cusseglier guvernativ Claudio Lardi prendì part.

La cumissiun sustegna da realisar duas ulteriuras mesiras ch'il cussegl grond ha approvadas l'avust 2003 en il rom da l'examinaziun da la structura e da las prestaziuns per sanar las finanzas dal chantun. Cun las duas mesiras aveva il cussegl grond incumbensà la regenza d'elavurar la basa legala per transferir la scola auta da tecnica ed economia (SATE) d'ina fundaziun da dretg privat en in institut autonom dal dretg public chantunal sco er per transferir la scola auta professiunala da pedagogia (SAP) en in institut autonom.

La cumissiun è unanimamain da l'idea che la missiva da la regenza cun ils sbozs da lescha cuntegnia ina basa adattada per la realisaziun da las duas mesiras. La cumissiun sustegna la decisiun strategica da concepir las duas scolas autas sco instituts autonoms da dretg public chantunal. L'independenza proponida suonda la tendenza da la lescha federala davart las scolas autas e duai augmentar la capacitad da concurrenza da las duas instituziuns sin la fiera da scolaziun svizra. Resguardond ils interess dal chantun duain domaduas scolas autas disponer d'ina autonomia adequata.

Il cussegl grond vegn a tractar il project durant la sessiun da december 2004.

Gremi: cumissiun per furmaziun e cultura
Funtauna: rg cumissiun per furmaziun e cultura