Dus onns suenter ils donns da malaura catastrofals dal november 2002 che avevan gì per consequenza grondas devastaziuns e destrucziuns en differentas parts da noss chantun ha la cumissiun "donns da malaura november 2002" fatg bilantscha anc ina giada. En quest connex han ins pudì constatar che las lavurs da rumir e da reparaziun cun ina summa totala dals donns da 150 milliuns francs èn avanzadas fitg bain e ch'ins ha gia pudì far giu quint davart 135 milliuns francs.

Las mesiras da reparaziun e da segirezza ch'èn vegnidas resguardadas sco urgentas han pudì vegnir terminadas gia l'onn 2003 curt avant il cumenzament da l'enviern. L'onn current èn alura vegnids exequids ils numerus projects da reparaziun ed igl è per gronda part vegnì fatg giu quint davart els. La summa totala dals donns da var 150 milliuns francs, stimada paucas emnas suenter las malauras, è sa cumprovada sin basa dals resultats dal rendaquint.

En questa summa totala dals donns èn cumpigliads er ils donns d'edifizis e da mobigliar assicura privat sco er ils donns da la rait da la viafier retica e da las vias chantunalas. Var 80 milliuns francs pertutgan las mesiras da reparaziun en 164 vischnancas. Da quels pertutgan var 8 milliuns francs las mesiras d'urgenza e las lavurs da reparaziun dals curs d'aua, 35 milliuns francs ils projects da meglieraziun, 34 milliuns ils projects forestals ed ils ulteriurs var trais miliuns francs las infrastructuras restantas da las vischnancas. Da quests custs portan la confederaziun ed il chantun var 60 milliuns francs. En questa survista ch'è decisiva per il rendaquint dals daners da donaziun n'èn betg cumpigliads ils projects consecutivs da la correcziun dals curs d'aua da totalmain 29 milliuns francs.

Practicamain fatg giu quint davart las ovras da meglieraziun pertutgadas
L'uffizi d'agricultura, meglieraziun da structura e mesiraziun ha gia fatg giu quint definitivamain davart 32,8 milliuns francs resp. 94 pertschient da la summa totala dals donns tar 86 da totalmain 89 vischnancas. Er davart la summa restanta dals donns da 2,1 milliuns francs duai vegnir fatg giu quint cun las vischnancas pertutgadas anc quest onn. Las ovras da meglieraziun èn per regla vegnidas subvenziunadas da la confederaziun e dal chantun cun 87,3 pertschient. Las prestaziuns da la cassa per donns elementars en la dimensiun da var 800'000 francs garanteschan che la part dals custs restants dals donns privats tar questas mesiras da reparaziun na surpassa betg diesch pertschient. Ultra da quai èn ils donns vi da bains immobigliars, vi d'averturas e vi dals conturns en il sectur da las zonas da construcziun sco er en tut las vischnancas senza projects communabels vegnids tractads e reglads da la cassa per donns elementars cun 5,5 milliuns francs.

Projects forestals tar 148 vischnancas
Las mesiras tecnicas tar ils vasts projects forestals d'avertura e da dustanza vegnan anc terminadas en il decurs dal mais da november 2004. Ils rendaquints marschan plainamain. Sch'in credit posteriur correspundent vegn approvà dal parlament federal pon ins er far giu quint definitivamain cun las 148 vischancas pertutgadas davart 80 pertschient da las mesiras forestalas fin la fin da l'onn.

20 milliuns francs restan a las vischnancas
Er la grevezza dals custs restants da las vischnancas per la reparaziun correspunda cun var 20 milliuns francs a la stimaziun oriunda. Las donaziuns ch'èn entradas permettan da reducir la grevezza per 6,2 milliuns francs tar las vischnancas pertutgadas il pli ferm. Gia la fin da december 2003 era vegnì communitgà a tut las vischnancas lur dretg probabel a donaziuns. Suenter la deducziun da las donaziuns directas da 2,8 milliuns francs è resultà anc in dretg a donaziuns da 3,4 milliuns francs per las vischnancas. Da quels èn var trais milliuns francs vegnids concedids il december 2003 sco pajaments a quint. Il rest da var 400'000 francs po pir vegnir pajà cur ch'ils rendaquints definitivs da tut las vischnancas èn avant maun. Cun paucas exepziuns dastgass quai esser pussaivel en l'emprim quartal dal 2005.

Orizont da planisaziun realistic
Il saldo dal conto "malauras november 2002" munta da preschent a 0,97 milliuns francs. Il conto cumpiglia la reserva correspundenta per il rendaquint definitiv cun las vischnancas e per cuvrir ils eventuals custs restants da donns pendents vi dals conturns da privats che na pon actualmain anc betg vegnir reparads pervi dals projects planisads da dustanza (rempars/ dustanzas, cunschets).

En tut po vegnir constatà che tant il giudicament dals donns sco er ils rendaquints correspundan a l'orizont da temp da la planisaziun.

Ils numerus donns vi dal funs e vi d'infrastructuras han pertutgà fermamain bleras vischnancas e blers privats. Senza il considerabel agid e senza ils mussaments da solidaritad da l'entira Svizra na fiss in dumogn uschè spert ed efficazi dals eveniments insumma betg stà imaginabel.

Gremi: departament da construcziun, traffic e selvicultura
Funtauna: rg departament da construcziun, traffic e selvicultura