Las vischnancas grischunas survegnan quest onn contribuziuns da gulivaziun da finanzas da totalmain var 22 milliuns francs. Da quels vegnan pajads var 14,5 milliuns francs per la gulivaziun da la forza fiscala, var tschintg milliuns per contribuziuns ad ovras publicas e var 2,5 milliuns per la gulivaziun dal basegn spezial (sanaziun da finanzas communalas e contribuziuns a studis da fusiun).
Per 40 vischnancas croda il dretg general da contribuziuns da gulivaziun da finanzas ad ovras publicas a partir dal 1. da schaner 2005. Cun quai vul la regenza dar dapli paisa al spustament dal diever dals meds davent da las contribuziuns tenor l'intent vers la gulivaziun da la forza fiscala betg liada. Per investiziuns necessarias ch'ina vischnanca na po betg finanziar malgrà la gulivaziun da la forza fiscala survegn ella sin dumonda vinavant contribuziuns ad ovras singulas.

Plazza aviatica da Samedan: La regenza spetga da Berna ina resposta svelta
Il manaschi da la plazza aviatica da Samedan duai ussa pudair vegnir surpiglià en moda speditiva da la nova manadra. La regenza grischuna spetga perquai da la confederaziun ch'ella prendia sveltamain las mesiras necessarias en quest connex, scriva ella en sia posiziun a l'uffizi federal da l'aviatica civila. La regenza sezza sustegna senza resalvas il transferiment da la concessiun e dal manaschi da l'associaziun eroport da l'Engiadin'auta a l'eroport Engiadina SA. L'eroport Engiadina SA duai cumenzar ses manaschi a Samedan il december 2004.

Da vischnancas e regiuns
- Samedan: En il territori dal vitg, a Promulins ed ad A l'En vegn introducì il tempo 30. La finamira da la reducziun dal tempo è la meglieraziun da la segirezza dal traffic e da la qualitad da viver entaifer il vitg da Samedan.
- Ftan: Il project preliminar per la plazza da sport "Quadras" en il territori tranter Ftan Grond e Ftan Pitschen è da princip vegnì approvà. Sco contribuziun chantunala da construcziun èn vegnids empermess var 100'000 francs.
- Riom: La regenza ha da princip approvà l'engrondiment dal stabiliment da scola ed empermess per quai ina contribuziun da var 200'000 francs.
- Nova corporaziun d'interess: Las vischnancas concessiunarias da las ovras electricas Zervreila SA (OEZ) èn s'unidas ad ina corporaziun da vischnancas. La regenza ha approvà ils statuts. La nova corporaziun vul coordinar ils interess e las finamiras da las vischnancas concessiunarias da Castrisch, Cumbel, Degen, Duvin, Flem, Glion, Luven, Panaduz Pitasch, Stussavgia, Sagogn, Schluein, Sevgein, S. Martin, Suraua, Tenna, Trin, Tumein, Valendau, Val S. Pieder, Vella e Versomi.

Contribuziuns chantunalas a differentas instituziuns
- Societad Heinrich Zschokke: Per il project d'ina biografia da Heinrich Zschokke (1771-1848) ha la regenza approvà ina contribuziun da 15'000 francs.

Projects da vias
- Via dal Flüela: La regenza ha approvà il project per la correcziun da la via sur il Höfjibach sin il territori communal da Tavau. Planisà è l'engrondiment dal tumbin per il Höfjibach. Per quai sto vegnir adattada la via dal Flüela sin ina lunghezza da var 80 meters.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun