La regenza ha approvà las disposiziuns executivas revedidas tar la lescha da taglia. Las disposiziuns executivas èn vegnidas adattadas a la revisiun parziala dal dretg fiscal chantunal che entra en vigur il 1. da schaner. Ultra da quai èn vegnidas adattadas differentas disposiziuns a la lescha federala davart l'armonisaziun da la taglia. Tranter auter è la responsabladad dals ertavels vegnida abolida: multas da taglia n'èn betg pli ereditaras.

Plinavant prevesan las novas disposiziuns executivas ina uschenumnada "taxaziun nulla" per cas spezials, tar ils quals l'incassament da taglia è inutil. Sch'in pajataglia retrai prestaziuns supplementaras respectivamain da sustegniment, duai da princip vegnir fatga ina taxaziun nulla. Adattada è er vegnida l'indemnisaziun a las vischnancas per la collavuraziun tar la taxaziun. Per la controlla d'entrada survegnan las vischnancas da nov set empè dad otg francs per cas, dentant vinavant almain 1000 francs. Las novaziuns en las disposiziuns executivas entran en vigur successivamain a partir dal schaner 2005.

La cussegliaziun professiunala per creschids daventa taxabla
Sedutas da cussegliaziun per la cussegliaziun professiunala, da carriera e da studi per creschids daventan taxablas a partir dal 1. da schaner 2005. Suenter in emprim discurs infurmativ gratuit en in center d'infurmaziun professiunala vegn da nov incassada ina pauschala da 150 francs per maximalmain trais sedutas da cussegliaziun durant in onn. La regenza ha deliberà la revisiun parziala correspundenta da la "ordinaziun davart l'organisaziun da la cussegliaziun professiunala". Il cussegl grond aveva decidì l'onn 2003 da betg pli porscher gratuitamain la cussegliaziun professiunala per creschids.

La revisiun parziala da la lescha per promover la tgira da malsauns entra en vigur il 2005
Il cumenzament da december è scadì il termin da referendum per la lescha per promover la tgira da malsauns ("lescha per promover la tgira da malsauns e l'assistenza da persunas attempadas e da persunas che basegnan tgira") senza ch'i saja vegnì profità dal referendum. La regenza ha mess en vigur il relasch per il 1. da schaner 2005.

Da vischnancas e regiuns
- Cuira: La regenza ha da princip dà glisch verda per l'engrondiment da la scola dal stgalim superiur Giacometti e garantì per il project ina contribuziun chantunala da 400'000 francs.

Contribuziuns chantunalas a differentas instituziuns
- Stabiliments ed edifizis da sport: Per la sanaziun dals implants da tir da pistola a Domat ed a Zizers sco er dal fundament da la plazza da hockey sin glatsch a Surava ha la regenza approvà en tut var 16'000 francs or dal fond da sport.
- Federaziun grischuna per il sport: L'onn 2005 survegn la federaziun ina contribuziun chantunala da 28'000 francs, en spezial per l'organisaziun dal premi grischun per il sport.

Projects da vias
- Malans: Per la sanaziun da la via chantunala tranter la plazza da posta e la plazza communala ha la regenza approvà ina contribuziun chantunala da var 52'000 francs.

Chaussas persunalas
- Dr. med Claudia Eckenberg e dr. med Bigna Infanger-Damur èn vegnidas elegidas sco medias superiuras en l'ospital da dunnas Fontana.

chanzlia chantunala dal Grischun
Gremi: regenza
Funtauna: rg chanzlia chantunala dal Grischun