La regenza ha approvà las concessiuns dal dretg da las auas per las ovras idraulicas dal Partenz. Uschia pon las ovras idraulicas existentas da la SA Rätia Energia Claustra (REC) vegnir manadas anc per ulteriurs 80 onns.

Il zercladur 2001 han concedì la vischnanca da Tavau sco er las vischnancas da Claustra-Serneus, Cunter en il Partenz, Küblis, Luzein, St. Antönien-Ascharina, Wiesen, Filisur, Schmitten, Alvagni, Surava, Casti quatter novas concessiuns a la REC. Quellas ha la regenza ussa approvà. Uschia survegn la REC il dretg da manar ses implants electrics en il Partenz per ulteriurs 80 onns.

La planisaziun da protecziun e d'utilisaziun è vegnida approvada dal cussegl federal
Per quest nov concessiunament èn stads necessaris scleriments extendids areguard l'ambient. En quest connex è la REC sa decidida da far ina planisaziun da protecziun e d'utilisaziun ch'era vegnida approvada dal cussegl federal gia la primavaira passada. Per quest intent paja la REC tranter auter ina summa considerabla ad in project da revitalisaziun per lung la Lanquart per cumpensar ils donns previsibels dal manaschi da l'ovra idraulica sin las auas e sin la cuntrada.
Las ovras idraulicas dal Partenz consistan da trais stgalims da forza idraulica che portan totalmain ina prestaziun installada da 69 megawatts e produceschan ina media annuala da 232 milliuns uras kilowatts. Quai correspunda a var trais pertschient da la producziun totala annuala dal Grischun. Las prescripziuns pli severas da l'aua restanta chaschunan a la REC - en cumparegliaziun cun il manaschi tenor il dretg vegl - ina perdita da producziun da ca. trais pertschient da sia producziun totala d'energia.

Segirà vinavant il manaschi
Il dretg d'utilisaziun da las forzas idraulicas sin il territori da la vischnanca da Saas ha stuì vegnir concedì da la regenza, suenter che la radunanza communala aveva refusà in nov concessiunament a la REC. La regenza ha uschia fatg diever da ses dretg legal d'ina concessiun sfurzada per segirar vinavant il manaschi da las ovras idraulicas dal Partenz.

Indemnisaziuns impurtantas per las vischnancas e per il chantun
Perquai ch'il chantun e las vischnancas renunzian al return en posses dals implants electrics, paja la REC al chantun ed a las vischnancas concessiunarias 112 milliuns francs. L'indemnisaziun sa divida en in import en daner blut (65 milliuns francs) ed en in import dependent dal success (47 milliuns francs). Vitiers vegnan prestaziuns annualas regularas a las vischnancas ed al chantun, en spezial en furma da tschains d'aua e da taglia sin implants idraulics da mintgamai 1,5 milliuns francs, sco er l'energia da concessiun.

Gremi: departament da construcziun, traffic e selvicultura
Funtauna: rg departament da construcziun, traffic e selvicultura