L'avust 2003 ha il cussegl grond decidì in ampel pachet da mesiras da spargn per pudair tegnair en equiliber las finanzas chantunalas senza stuair augmentar las taglias. Ina da questas mesiras pertutga la procedura d'admissiun a las scolas medias grischunas. Per ils onns 2004 fin 2007 ha il cussegl grond fixà definitivamain il dumber d'admissiun. La finamira è quella da spargnar ils proxims quatter onns totalmain 11.6 milliuns francs en il sectur da las scolas medias.

Il pachet da spargn preschentà l'onn 2003 da la regenza al cussegl grond preveseva da limitar il dumber d'admissiun al gimnasi inferiur cun introducir classas da prestaziun. Cuntrariamain n'ha il cussegl grond betg vulì cumbinar midadas da structura e mesiras da spargn. Perquai ha el decidì da reducir il dumber d'admissiun a las scolas medias en ils onns 2004 fin 2007 per 10%. L'incumbensa da fracziun Arquint pretenda uss che la regenza sclereschia fin l'onn 2006 tge consequenzas che l'aboliziun dal gimnasi inferiur pudess avair per il chantun Grischun.
La regenza ha prescrit sco finamira a lunga vista ina quota da maturitad gimnasiala da 15%. Calculaziuns approximativas per il chantun Grischun mussan actualmain ina quota chantunala da maturitad da ca. 18.6% (CH 18.8%) per l'onn 2005. Ils motivs per la determinaziun a lunga vista da la quota da maturitad gimnasiala èn d'ina vart quel ch'ils davos onns èn s'augmentadas ferm las expensas en il sectur da las scolas medias e da l'autra vart quel che la purschida da scolaziun en il sectur dals emprendissadis professiunals ha pudì vegnir meglierada massivamain cun introducir la maturitad professiunala e cun engrondir las scolas autas professiunalas. Scolaras e scolars che oz na reusseschan betg da frequentar il gimnasi, n'han en il futur nagin dischavantatg cun ina furmaziun professiunala. Cun la maturitad professiunala e cun las scolas autas professiunalas als stat a disposiziun ina purschida da scolaziun independenta ed orientada a la pratica. La passarella, ina pussaivladad creada da nov, permetta a maturandas e maturands professiunals qualifitgads e diligents da sa preparar en dus fin trais semesters per in examen supplementar. Sch'els reusseschan l'examen supplementar survegnan els access a tut ils percurs da scolaziun da las scolas autas universitaras da la Svizra. Uschia pon ins surpigliar la responsabladad per las restricziuns d'admissiun a las scolas medias er dal puntg da vista da la politica da furmaziun.

Gremi: uffizi per las scolas medias
funtauna: rg uffizi per las scolas medias