La missiva da la regenza davart la revisiun parziala da la lescha da taglia LT è ussa avant maun; il parlament vegn a tractar ella en la sessiun da zercladur. La revisiun cumpiglia essenzialmain in'adattaziun furmala e diversas adattaziuns materialas da la lescha chantunala da taglia al dretg federal surordinà. Tranter auter vegn concedida da nov ina "deducziun d'impedids". Cun quella vegn tegnì quint dals custs chaschunads tras ils impediments. Cuntrari a la deducziun dals custs da malsogna na sto il pajataglia purtar qua nagina resalva persunala. La deducziun d'impedids è vegnida introducida sin plaun federal per il 1. da schaner 2004 tras la lescha davart l'egualitad dals impedids e sto vegnir introducida obligatoriamain dals chantuns.
Questa revisiun da la lescha da taglia anticipescha er gia dus puncts dal pachet fiscals 2001 da la confederaziun: la "deducziun per la tgira d'uffants" e la uschenumnada "dispensaziun dal minimum d'existenza". Tar la deducziun per la tira d'uffants duain ils custs effectivs per la tgira d'uffants pudair vegnir deducids da nov fin ad in maximum da 7000.- francs per uffant. La dispensaziun dal minimum d'existenza signifitga che l'administraziun survegn la cumpetenza da renunziar ad ina imposiziun da taglia, sch'ina prelevaziun da taglia para d'esser invana ed in relasch da taglia stuess vegnir concedì regularmain. La deducziun per la tgira d'uffants croda er en la LT revedida, sch'il pachet fiscal 2001 da la confederaziun vegn refusà dal suveran ils 16 da matg, la dispensaziun dal minimum d'existenza betg.
Questa revisiun parziala da la lescha da taglia chaschuna entradas pli pitschnas da var 750'000 francs. Quellas ston vegnir attribuidas principalmain a la deducziun d'impedids nova.

Scolas professiunalas da Glion e Cuira: rumantsch e tudestg fin l'onn 2008
L'instrucziun betg specifica dal rom resta da princip bilingua rumantsch-tudestga en las scolas professiunalas da Glion e Cuira. La regenza ha prolungà l'uschenumnà model da splitting per l'instrucziun da furmaziun generala IFG per ulteriurs quatter onns. Emprendistas ed emprendists cun il lieu d'emprendissadi en la Surselva vegnan da princip a frequentar la IFG a Glion. Per excepziuns vegn da nov ad esser cumpetent sulettamain l'uffizi per la furmaziun professiunala. La scola professiunala da Cuira vegn a porscher rumantsch sco ulteriur rom facultativ, sche l'interess è grond avunda. L'instrucziun specifica è perencunter sco fin uss en quella scola professiunala ch'è cumpetenta per quai tenor la repartiziun dals districts da scola.
L'emprima fasa d'emprova cun il model da splitting da trais onns va a fin per la fin da l'onn da scola 2003/2004. Ils custs supplementars per l'instrucziun bilingua importan a Glion var 250'000 francs per onn. Da quels surpiglia il chantun var 75'000 francs, il rest va a donn e cust da la confederaziun e da las vischnancas.
Perscrutaziun da cellas embrionalas regulada en moda persvadenta
La regenza grischuna approvescha il sboz da la uschenumnada "ordinaziun davart la perscrutaziun da cellas embrionalas". Ella tegnia quint avunda da la tematica sensibla e garanteschia la dignitad da l'uman, scriva la regenza en sia consultaziun a l'uffizi federal da sanitad. Betg clera resta mo la dumonda, da tgi che la cumissiun etica dal chantun Grischun vegnia infurmada davart enconuschientschas novas e relevantas en la scienza, per giuditgar da nov in project da perscrutaziun sut aspects etics. L'ordinaziun entra en vigur il medem mument sco la lescha davart la perscrutaziun da cellas embrionalas, previsiblamain il 1. da fanadur.

Da vischnancas e regiuns
- Ramosch-Tschlin: Il dumber da commembers dal cussegl da scola dal consorzi da scola cuminiavel è vegnì reducì dad otg a sis. Ultra da quai è il cussegl da scola da nov abel da decider, sche almain quatter (fin ussa sis) commembers èn preschents. La regenza ha approvà ils statuts revedids parzialmain dal consorzi da scola Ramosch-Tschlin.
- Mesauc: La regenza ha approvà la nova constituziun cirquitala.

Contribuziuns chantunalas a differentas instituziuns
- Argo Cuira: Per la restauraziun da l'abitaziun da la direcziun da la chasa Surava da la fundaziun center grischun per lavuratoris e dimoras d'impedids ha la regenza garantì ina contribuziun da construcziun da var 160'000 francs.

Projects da vias
- Via da la Calanca: Per lavurs d'impressari en il tunnel Val d'Infern èn vegnids deliberads var 5,9 milliuns francs.
- S-chanf: La regenza ha approvà il project per la construcziun nova dal passape a "Pradels" e mess a disposiziun per quai ina contribuziun chantunala da 70'000 francs.

Chaussas persunalas
- Gion Lechmann (36) da Falera è vegnì elegì sco nov conrectur e commember da la direcziun da la scola chantunala grischuna. El cumenza sia plazza il 1. da fanadur 2004.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun