La revisiun parziala da la lescha davart la scol'auta professiunala da pedagogia (LSAP), la nova lescha davart la scol'auta da tecnica ed economia e la revisiun parziala correspundenta da l'ordinaziun dal persunal èn vegnidas dadas libras da la regenza per la consultaziun. Cun transferir la SAP e la SATE en instituts autonoms dal dretg public chantunal duain vegnir adattadas lur organisaziun, direcziun e finanziaziun a las pretensiuns naziunalas ed internaziunalas.

Ils sbozs da consultaziun èn il resultat da duas mesiras dal project da la "examinaziun da las structuras e da las prestaziuns per sanar las finanzas dal chantun" da l'onn 2003.

la scola chantunala po il franzos vegnir elegì sco rom da maturitad
La regenza ha revedì ils uraris gimnasials ed ils plans d'instrucziun da la scola chantunala grischuna; qua tras vegn la valur dal franzos augmentada. Roms obligatoris al stgalim superiur da la scola populara èn dapi l'onn da scola 2002/2003 ina lingua chantunala e l'englais - empè da franzos sco dapi l'onn 1999. L'onn da scola proxim vegnan pia scolaras e scolars al gimnasi, che han bain enconuschientschas preliminaras d'ina lingua chantunala e da l'englais, dentant betg dal franzos. A partir da l'onn da scola 2004/2005 han las scolaras ed ils scolars la pussaivladad d'eleger sco rom da maturitad ubain ina segunda lingua chantunala ubain il franzos.

Nova ordinaziun davart la construcziun da scolas: l'obligaziun da rembursament resta
En il futur vegnan utilisads adina dapli chasas e stabiliments da scola per auters intents. En tals cas pretenda l'ordinaziun davart la construcziun da scolas che eventualas contribuziuns chantunalas vegnian pajadas enavos proporziunalmain: mintga onn diesch pertschient da la valur cudeschada restanta (princip d'amortisaziun degressiv). La regenza ha uss revedì l'ordinaziun davart la construcziun da scolas. Edifizis subvenziunads vegnan da nov amortisads cumplettamain entaifer ventg onns, pia cun tschintg pertschient per onn (amortisaziun lineara). Ultra da quai po la regenza desister d'ina pretensiun da rembursament en cas excepziunals. Il princip da l'obligaziun da rembursament vegn dentant mantegnì.

Motivs per la midada d'utilisaziun da stabiliments ed edifizis da scola èn ils dumbers da naschientschas che sa reduceschan e la nova politica da subvenziun dal chantun. Perquai decidan las vischnancas pli savens da fusiunar lur scolas popularas sin plaun regiunal. La revisiun parziala entra en vigur retroactivamain per il 1. d'avrigl 2004.

La realisaziun da la constituziun chantunala s'avanza a moda speditiva
Suenter che las votantas ed ils votants dal Grischun han approvà la nova constituziun chantunala 2003, lavuran ils departaments e la chanzlia chantunala vi da la realisaziun da quella. Var in quart dals 550 relaschs examinads sto vegnir adattà formalmain e materialmain a las disposiziuns da la nova constituziun chantunala; 43 da quels fin la fin da l'onn 2006. In basegn d'adattaziun exista cunzunt en ils secturs "linguas chantunalas ed uffizialas", "dretgs politics", "organisaziun giudiziala", "taglias" e "collavuraziun locala e regiunala".

Nagin asil, nagina assistenza d'asil - il chantun stgaffescha persuenter structuras d'agid d'urgenza
Persunas che na survegnan betg asil en Svizra èn exclusas da l'assistenza d'asil. Quai han concludì las chombras federalas il december 2003 en il rom dal program da distgargia 2003. Ils chantuns ston uss stgaffir fin mez avrigl 2004 ina structura d'agid d'urgenza en in institut chantunal per persunas cun ina decisiun d'asil negativa. La regenza ha delegà questa incumbensa al departament da giustia, polizia e sanitad.

Consultaziuns a la confederaziun
- Uffizi federal da traffic: La regenza propona da renunziar al relasch d'ina "basa legala per il traffic coordinà sin plaun federal". La pli gronda part dals disturbis dal traffic vegn schliada tras ils furniturs da prestaziuns en il sectur da traffic, tras las autoritads chantunalas e tras las vischnancas. Ina coordinaziun tras la confederaziun n'è betg necessaria, il relasch er betg.
- Departament federal da finanzas: La regenza sustegna da princip la revisiun da la "lescha federala davart la bursa ed il commerzi cun valurs" e la midada da la "disposiziun davart l'assistenza administrativa internaziunala".
- Departament federal da giustia e polizia: La regenza sustegna da princip ina revisiun parziala dal "dretg d'obligaziuns" e da la "lescha federala davart la concurrenza illoiala" che vul meglierar la protecziun da consumentas e consuments. Cun il project "dretgs d'utilisar parzialmain immobiglias" duain vegnir protegids cunzunt consumentas e consuments che vegnan surmanads en las vacanzas u tar chaschuns sumegliantas da far uschenumnads contracts da "time-sharing".
- Chanzlia federala: La regenza dat en general in giudicament positiv davart il sboz tar la revisiun parziala da la "lescha davart l'organisaziun da la regenza e da l'administraziun". Contracts dals chantuns tranter els u cun l'exteriur na ston betg pli vegnir approvads da la confederaziun. Ils chantuns che fan in contract èn uss obligads d'infurmar la confederaziun.

Da vischnancas e regiuns
- Puschlav: La revisiun parziala da la lescha davart las taxas da cura è vegnida approvada. Ella entra en vigur retroactivamain per il 1. da november 2003.
- Says: La revisiun totala da la lescha communala da taglia è vegnida approvada. La taglia sin immobiglias dad 1,5 promils fixada qua sa lascha mantegnair mo cun las premissas che domineschan actualmain. Sche quellas na vegnan betg pli ademplidas, sto la vischnanca reducir la taglia sin immobiglias ad in promil. La revisiun totala entra en vigur retroactivamain per il 1. da schaner 2004.

Contribuziuns chantunalas a differentas instituziuns
- Promoziun da la cultura: Per differentas ovras ed occurrenzas culturalas ha la regenza deliberà garanzias da deficit e contribuziuns da producziun da var 150'000 francs. Resguardas èn vegnidas 21 dumondas da contribuziuns. Ulteriurs 56'000 francs èn vegnids approvads totalmain per l'anteriura societad dals picturs, sculpturs ed architects svizzers - uss "visarte.grischun" - e per l'anteriura cuminanza da lavur grischuna da cudeschs per la giuventetgna - uss "leger.GR".

Projects da vias
- Pratval: A la via da la Tumleastga po vegnir construida la fermada da duas varts per il traffic public. La regenza ha approvà il project e concedì ina contribuziun da var 47'000 francs.
- Küblis: La regenza ha approvà il project per la construcziun nova da la via da Cunter (da Küblis entaifer il vitg fin a la punt da la Landquart). Il traject vegl inclusiv il spartavias en direcziun da Saas ceda il chantun a la vischnanca. La construcziun nova custa totalmain var 2,9 milliuns francs.
- Var 3,9 milliuns francs ha la regenza approvà totalmain per differentas lavurs da construcziun vi da trajects da vias e punts da la rait da vias dal Grischun:
- A 13: plazza da controlla per il traffic da camiuns pesants Unterrealta;
- via da Val S. Pieder: Glion-Val S. Pieder tranter Bucarischauna e Val S. Pieder;
- via da Samignun: punt da Schergenbach, Ravaisch, e punt da la val Maisas, Samignun;
- via dal Güglia: correcziun en il vitg da Tinizong e traject Natons-punt da Giüstia.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun