La swisscom broadcast surpiglia dal chantun Grischun 84,4% dal chapital d'aczias da la tele rätia. La tele rätia è responsabla per il provediment terrester dal chantun Grischun cun programs da televisiun da l'exteriur sco er cun programs da televisiun e da radio locals ed avra totalmain 195 vischnancas. Cun in dumber da tschintg collavuraturas e collavuraturs fa l'interpresa ina svieuta annuala da var 4 milliuns francs.

La tele rätia è vegnida fundada l'onn 1980 cun l'intent da proveder il chantun Grischun cun programs da televisiun da l'exteriur. La transmissiun da programs da televisiun da l'exteriur sco er da programs da televisiun e da radio locals tras la tele rätia succeda oz en furma analoga. Il futur da la tele rätia vegn ad esser ina purschida che po resister a la concurrenza sin basa da la tecnologia digitala (DVB-T). Quai correspunda a la strategia sviluppada da la regenza grischuna l'onn 2002, tenor la quala la televisiun a cabel vegn ad esser pussaivla mo en ils centers fitg populads, uschia che l'avertura cun la televisiun terrestra che cuvra tut il territori duai vegnir prendida en mira.
En Svizra è la swisscom broadcast il distribuider principal d'infrastructura pertutgant servetschs da radio e la transmissiun senza cabel sco er ils servetschs cun valur agiuntada colliads cun quai. Cun 240 collavuraturas e collavuraturs tegna l'interpresa en funcziun var 500 lieus da transmissiun ed ha fatg l'onn 2003 ina svieuta da 149 milliuns francs. Cun la swisscom broadcast ha pudì vegnir chattada la partenaria ideala per il chantun. La swisscom broadcast garantescha per in'amplificaziun sistematica da l'infrastructura da DVB-T. Resalvà per la surpigliada resta che l'uffizi federal da communicaziun (UFCOM) permettia la midada da concessiun davent da la tecnica analoga a la tecnica da DVB-T.

La televisiun digitala basegna grondas investiziuns
La midada vegninta da la tecnica da diffusiun analoga a la tecnica digitala basegna grondas investiziuns ils proxims onns. Avant che far questas investiziuns venda il chantun Grischun la maioritad da las aczias da la tele rätia a la swisscom broadcast. Proprietaris dals ulteriurs 15.6% da las aczias èn differentas vischnancas e regiuns e differents circuls en il chantun Grischun. Davart il pretsch d'acquist èn ins sa cunvegnì da taschair.
Sco veglia manadra e possessura da lieus da transmissiun en tut la Svizra po la swisscom broadcast cumplettar la distribuziun geografica confurm a la strategia. Grazia a l'experientscha cun il manaschi d'indrizs da DVB-T (distribuziun terrestra da la televisiun digitala) po l'interpresa porscher a lunga vista ina transmissiun da televisiun da fitg buna qualitad a la populaziun dal Grischun.
Il model da gestiun prevesa che la swisscom broadcast investeschia en l'infrastructura, mainia l'infrastructura ed introduceschia ils products e servetschs respectivs (business-to-business). La tele rätia surpiglia vinavant l'assistenza finala da la clientella sco er il marketing e la vendita (business-to-consumer). La tele rätia resta ina interpresa autonoma.

Gremi: regenza
Funtauna: rg departament da l'intern e da l'economia publica e swisscom broadcast AG