Ils 28 d'avrigl 2004 èn sa scuntrads a Cuira ils represchentants da la corporaziun da vischnancas Surselva e da las vischnancas da Puntraschigna e da Samedan per tractar lur eventualas candidaturas per realisar ina sessiun da las chombras federalas 2006 en la part rumantscha dal Grischun. La discussiun ch'è vegnida presidiada da cusseglier guvernativ Klaus Huber ha mussà cleramain che tant l'Engiadin'ota sco er la Surselva èn capavlas da preschentar candidaturas attractivas.
Las duas delegaziuns èn sa cunvegnidas da recumandar a l'assamblea federala a Berna la destinaziun Flem / Laax / Falera e là sco center l'hotel da dietas e da congress Park Hotel Waldhaus per la sessiun en la regiun 2006. Ils proxims pass èn da far scleriments al lieu - ensemen cun il secretariat general da l'assamblea federala - e d'inoltrar alura la candidatura concreta fin la fin da l'onn 2004. Las chombras federalas vegnan probablamain a decider definitivamain en la sessiun da settember 2004 nua ch'ellas vegnan a sa radunar durant la renovaziun da l'edifizi dal parlament. Il Grischun è pront da pussibilitar sco osp cordial a las commembras ed als commembers dal parlament in segiurn nunemblidaivel en la part rumantscha dal Grischun.

Gremi: chanzlia chantunala dal Grischun
Funtauna: rg chanzlia chantunala dal Grischun