Diesch artistas ed artists grischuns survegnan quest onn mintgamai 20'000 francs sco stipendi u sco contribuziun ad in'ovra. Cun quels meds duain els pudair sa deditgar per in tschert temp intensivamain a lur lavur artistica. En il rom da la concurrenza per la "promoziun da la lavur culturala professiunala" èn lur lavurs inoltradas vegnidas undradas spezialmain (document pdf cun pussaivladad da chargiar sin l'agen computer). En tut èn vegnidas inoltradas quest onn 62 dumondas cun lavurs da las spartas d'art las pli differentas.
In sustegn en il rom da la concurrenza per la "promoziun da la lavur culturala professiunala" 2004 survegnan:

num | sparta
Hannah Katharina Disch art figurativ
Patricia Jegher art figurativ
Felix Benesch film / video
Sarah Haegler film / video
Riccardo Lurati film / video
Thomas G. Brunner litteratura
Michael Schmid litteratura
Fortunat Fröhlich musica
Achim Wolfgang Lenz teater / saut
Andrea Zogg teater / saut

Asils da selvaschina pli pitschens, ma pli numerus
La regenza ha approvà la revisiun da las disposiziuns generalas davart ils asils da selvaschina. En il senn da l'ultima revisiun da l'onn 1998 vegnan uss introducids er en ils districts da chatscha VII (Engiadin'ota), IX (Sur Tasna-Val Müstair) e XII (Plaun-Plessur-Tschintg Vitgs) asils da selvaschina pli pitschens, ma pli numerus. Il dumber d'asils da selvaschina s'augmenta uschia da 319 a totalmain 371, lur surfatscha totala sa reducescha per 15 km2 a totalmain 736 km2.

Da nov vegn introducida ina disposiziun, tenor la quala ils cunfins en il territori na vegnan betg pli marcads en cas d'asils d'utschels selvadis da l'aua ch'èn definids tras ina tscherta distanza da las auas. Plinavant vegn fixà che la chatscha da guetta e la chatscha cun traplas èn permessas en ils asils da chatscha bassa a partir dal 1. da december. Quai vegn pratitgà gia oz uschia.

Radios locals: la nova planisaziun da la rait d'emetturs porta pauc nov per il mument
La purtada dals radios locals vegn definida tras l'uschenumnada "planisaziun da la rait d'emetturs". Sin quella sa basan er las singulas concessiuns. La planisaziun da la rait d'emetturs actuala da l'onn 1994 scada la fin da l'onn e sto perquai vegnir renovada. Ella vegn ad esser valaivla fin che la nova lescha federala davart radio e televisiun (LRTV) entra en vigur. Perquai n'è vegnì midà - dal puntg da vista grischun - nagut essenzial en il sboz da las novas directivas dal cussegl federal per la planisaziun da las raits d'emetturs dad UUC.

La regenza grischuna è d'accord da segirar en quella moda ils radios locals fin a l'entrada en vigur da la nova LRTV. Pervi da la topografia dal chantun dependa la derasaziun dals radios locals grischuns bunamain dal tuttafatg da questa soluziun. I stoppia però esser garantì er en il futur che tut las trais linguas chantunalas possian vegnir recepidas en las valladas grischunas sur las frequenzas dad UUC, scriva la regenza grischuna en sia consultaziun a l'uffizi federal da communicaziun. En quel senn è la regenza er d'accord d'unir ils territoris da provediment ch'eran fin uss separads dal puntg da vista tecnic, numnadamain il Grischun dal nord dal radio grischa ed il Grischun dal sid dal radio Engiadina; las duas concessiuns ston dentant restar separadas.

Occurrenzas d'infurmaziun davart ils novs relaschs da submissiun
La regenza ha mess en vigur la nova lescha da submissiun per il 1. da fanadur 2004 ed approvà l'ordinaziun da submissiun respectiva ch'è vegnida revedida totalmain. Las novaziuns da la revisiun da la lescha e las experientschas da fin uss en l'execuziun da las prescripziuns chantunalas da submissiun vegnan explitgadas a chaschun da curs spezials. Quels curs sa drizzan ad incumbensadras ed incumbensaders, ad offerentas ed offerents ed ad ulteriuras persunas ch'èn incaricadas cun la preparaziun, cun la realisaziun u cun la controlla d'acquisiziuns publicas.

Il motiv central per la revisiun da las prescripziuns da submissiun vertentas è stada la cunvegna bilaterala davart las acquisiziuns publicas tranter la Svizra e l'uniun europeica. La revisiun da las prescripziuns chantunalas ha en spezial renunzià a la separaziun d'enfin uss tranter il sectur dal martgà intern ed il sectur da contract internaziunal en favur d'ina concentraziun da las prescripziuns.

Contribuziuns a differentas instituziuns
- La collecta da la rogaziun federala va quest onn a las suandantas trais instituziuns:
- a la pro juventute che s'engascha per ils dretgs dals uffants e giuvenils,
- a la fundaziun per la psichiatria d'uffants e giuvenils en il Grischun che s'engascha principalmain per il tractament da svilups fallads e da mals tar uffants e giuvenils, ed
- al team per l'agid a sasez dal Grischun che gida persunas singulas da dumagnar meglier grevas situaziuns da vita.
- Guaud grischun: Per differents projects ha la regenza garantì totalmain ca. 650'000 francs a las vischnancas da Siat (project da selvicultura "Chiltgera-Fanels"), Surava e Casti (project da via da guaud "Surava"), Mastrils (project integral "Mastrils") sco er Claustra-Serneus (project da via da guaud "Schlappin"). I sa tracta tranter auter da la tgira e da la renovaziun dal guaud giuven, da novas vias da guaud e da rumidas d'uals.

Projects da vias
- Via dadens da la Mantogna: Sin il traject da Lochmühle-Flearda-Urmagn-Tschappina sura (plazza da volver per autos da posta) dastgan ils vehichels da nov pasar 34 tonnas, a partir dal 1. da schaner 2005 40 tonnas.
- Cunter-Salouf-Riom-Parsonz: Da nov vegnan permess mintgamai da mez avrigl fin mez november er grevs camiuns cun remortga a sella.
- Logiano-Deira: Il pais maximal vegn augmentà da 19 a 28 tonnas.
- La regenza ha approvà differentas lavurs da construcziun en l'autezza da var tschintg milliuns francs vi da trajects da vias, tunnels e passapes da la rait da vias dal Grischun:
- sviament da Claustra
- sanaziun dal tunnel dal San Bernardin
- sanaziun dal tunnel Rofla
- Igis (dischlocaziun dal passape da la via veglia dal Partenz, territori da Waldau)

chanzlia chantunala dal Grischun

Gremi: regenza
Funtauna: rg chanzlia chantunala dal Grischun