IL PRESIDI DA LA CUMINANZA DA LAVUR DA LAS REGIUNS ALPINAS (ARGE ALP) VA DAL TIROL A TRENTO

A chaschun da la conferenza dals schefs da las regenzas la fin da zercladur va a fin er il presidi dal Tirol che ha durà dus onns. Fin la mesadad da l'onn 2006 presidiescha alura la provinza autonoma da Trento la ARGE ALP. Per la finiziun dal presidi tirolais vegn surdà il premi da la ARGE ALP 2004.

Il tema dal premi da la ARGE ALP da quest onn - "architectura-furmar-alps-concepir" - ha chattà in grond resun en tut il territori dals indesch commembers. Betg main che 67 projects èn vegnids inoltrads; dudesch da la Svizra, e da quels quatter dal Grischun. Il president da la ARGE ALP, il guvernatur tirolais Herwig van Staa, vegn a communitgar ils projects victurs en il rom da la conferenza dals schefs da las regenzas ad Alpbach e vegn a surdar ils trais premis principals e dus premis da renconuschientscha.

Cuntrari als premis d'architectura dal passà èn stads tschertgads tar questa concurrenza concepts generals da lunga durada che correspundan a la pretensiun d'ina qualitad architectonica moderna, ch'èn concepids a lung termin e che cuntentan las aspectativas da la persistenza en la furmaziun dal territori alpin.

L'uniun europeica ed il traffic sco temas principals
Avant dus onns ha il Tirol surpiglià il presidi da la ARGE ALP. Sco motiv principal da ses presidi è vegnì accentuà il tema "europeisaziun da la ARGE ALP". Quai è vegnì fatg cun differentas resoluziuns, sco per exempel tar il sboz d'in contract constituziunal da l'uniun europeica, tar la realisaziun da la convenziun da las Alps, tar la refurma da la politica agrara communabla e tar la politica da traffic europeica.

L'onn 2004 ha il Tirol medemamain mess las prioritads politicas en il sectur da l'uniun europeica e dal traffic. La cumissiun da traffic da la ARGE ALP ha formulà ina decleraziun davart la persistenza en la politica da traffic europeica. Pretendidas vegnan ina politica da traffic ecologica ed ina repartiziun equilibrada da las immissiuns dal traffic. Ina contribuziun en il senn da questa finamira fiss d'armonisar las regulaziuns davart la calculaziun da las taxas. Quella pudess s'orientar a la cunvegna tranter l'uniun europeica e la Svizra.

La ARGE ALP sustegna la construcziun da la NVTA
Il spustament dal traffic da vitgira da la via sin la viafier pretenda che l'effizienza dal traffic da viafier transcunfinal sa megliereschia considerablamain. La ARGE ALP sustegna perquai la realisaziun da la nova lingia da viafier tras las Alps (NVTA) e la cuntinuaziun dal trassé da gronda capacitad vers il sid fin Lugano. En spezial pretenda ella che quest project vegnia realisà uschia ch'el saja cumpatibel cun las infrastructuras da viafier previsas en Italia e possia ultra da quai satisfar a las pretensiuns dal traffic da vitgira, dal traffic da transit e dal traffic da persunas regiunal.

En vista a quests fatgs beneventan ils schefs da las regenzas l'electrificaziun da la lingia da viafier da Minca a Lindau. Cun integrar uschia meglier la Baviera en la futura NVTA vegn prestada ina contribuziun essenziala al spustament dal traffic da transit tras las Alps da la via sin la viafier.

Var ventg projects en preparaziun per ils onns 2004 e 2005
Il preventiv da la ARGE ALP per ils onns 2004/05 prevesa expensas totalas da var 500'000 euros. Quests daners vegnan utilisads en spezial per la lavur da project en il rom da las quatter cumissiuns "traffic", "cultura e furmaziun", "ambient, planificaziun territoriala ed agricultura" sco er "economia e lavur". Las cumissiuns elavuran actualmain var ventg projects.

A la 35avla conferenza dals schefs da las regenzas da la ARGE ALP dals 25 da zercladur ad Alpbach vegnan a sa participar represchentantas e represchentants dals suandants stadis e chantuns resp. da las suandantas provinzas: Baden-Württemberg, Baviera, Bulsaun-Tirol dal sid, Grischun, Lumbardia, Salzburg, Son Gagl, Tessin, Tirol, Trento e Vorarlberg.

Ulteriuras infurmaziuns:
- Ina survista dals projects ils pli impurtants da las quatter cumissiuns da la ARGE ALP po vegnir chargiada qua sin l'agen computer.
- www.argealp.org

Gremi: regenza
Funtauna: rg chanzlia chantunala dal Grischun