Las propostas che la regenza fa al cussegl grond concernent las revisiuns parzialas da la lescha da scolina e da la lescha da scola sco er concernent l'ordinaziun davart la salarisaziun da las persunas d'instrucziun da la scola populara e da las mussadras en il chantun Grischun èn uss avant maun. En emprima lingia vai per la structura dals salaris da las persunas d'instrucziun - ed en il medem mument er per las contribuziuns pauschalas dal chantun a las vischnancas - e per las cumpetenzas dal cussegl grond en quest sectur. Concretamain duai vegnir adattada la salarisaziun minimala da:
- persunas d'instrucziun da la scolina (plus 4 pertschient),
- persunas d'instrucziun da la scola reala (plus 5,9 pertschient),
- persunas d'instrucziun da classas pitschnas da las scolas realas e secundaras (adattaziun al nivel da las persunas d'instrucziun da la scola reala e secundara),
- persunas d'instrucziun spezialisadas da la scola primara (adattaziun al nivel da las persunas d'instrucziun da la scola primara),
- persunas d'instrucziun spezialisadas da la scola reala e secundara (media tranter las persunas d'instrucziun da la scola primara e reala resp. secundara) e
- persunas d'instrucziun senza il diplom correspundent (salarisaziun sco las persunas d'instrucziun da la scola primara).
Da nov duai il cussegl grond survegnir la cumpetenza da pudair reducir u augmentar las contribuziuns pauschalas dal chantun a las vischnancas per annualmain maximalmain tschintg pertschient, totalmain per maximalmain diesch pertschient.
Il cussegl grond dal Grischun vegn a tractar la missiva da la regenza en la sessiun d'october 2004.

Reducziun dal pensum da l'incumbensà per protecziun da datas
La regenza ha reducì il pensum da l'incumbensà chantunal per protecziun da datas cun vigur a partir dal 1. da schaner 2005. Qua tras ademplescha ella ina directiva dal cussegl grond. En la sessiun d'avrigl aveva quel refusà d'adossar ina part dals custs per la protecziun da datas a las vischnancas ed - empè da quai - pretendì ina sbassada concreta dals custs en quest sectur.
Da la reducziun dal pensum da l'incumbensà per protecziun da datas a 50 pertschient resulta in respargn da var 30'000 francs. En il rom dal project per l'examinaziun da las structuras e da las prestaziuns per sanar las finanzas dal chantun era oriundamain previs da quintar questa summa sco prestaziuns che l'incumbensà chantunal per protecziun da datas furnescha per las vischnancas.

La lavur da matura vegn quintada tar la nota da promoziun
La nota da la lavur da matura quinta da nov sco nota da promoziun supplementara en il segund attestat da semester da la sisavla classa. La regenza ha approvà la revisiun da la "ordinaziun davart il gimnasi en il chantun Grischun". Fin uss è ina lavur da matura cun il predicat minimal "suffizient" stada ina premissa per l'admissiun a l'examen da maturitad. L'ordinaziun revedida entra en vigur il 1. d'avust.

Ordinaziun da bancas da gieu: La revisiun giavischada ha cumenzà
L'ordinaziun da bancas da gieu da l'onn 2000 vegn revedida: La purschida da gieus duai vegnir extendida, las pussaivladads da metter e gudagnar daners duain vegnir augmentadas e la tariffa da taglia duai vegnir sbassada. Questa deregulaziun en spezial per las bancas da gieu cun ina concessiun B saja stada urgentamain necessaria, scriva la regenza grischuna en sia consultaziun a la cumissiun federala da bancas da gieu. La revisiun proponida pussibilitescha in manaschi ordinari da casino, senza uschia promover il medem mument la dependenza dal gieu.
Il sboz da la nova ordinaziun da bancas da gieu prevesa dad auzar il maximum da daners che pon vegnir mess sin 25 francs e d'augmentar il gudogn maximal sin 25'000 francs. La regenza è persvadida che questa nova regulaziun haja er in effect positiv sin l'attractivitad turistica dals lieus da cura e da lur casinos; areguard las purschidas da gieus avess il sboz da l'ordinaziun anc pudì ir in pass pli lunsch. Per las entradas dal chantun n'ha la revisiun da la tariffa da taglia nagina influenza. La nova ordinaziun duai entrar en vigur gia quest onn.

Ulteriuras consultaziuns a la confederaziun
- Ordinaziun davart ils profils dal ADN: La regenza grischuna sustegna da princip las disposiziuns executivas da la "ordinaziun federala davart il diever da profils dal ADN en la procedura penala e per l'identificaziun da persunas nunenconuschentas u sparidas".

Da vischnancas e regiuns
- Tschappina: La sanaziun dal provediment d'aua vegn sustegnida cun ina contribuziun chantunala da var 80'000 francs.
Contribuziuns chantunalas a differentas instituziuns
- Uniun "lain dal grischun": La regenza sustegna er l'onn 2004 la promoziun dal lain grischun cun ina contribuziun chantunala da 300'000 francs.
- Projects forestals: Per reparar ils rempars cunter lavinas da Motta Mundin ost a Tschlin e per renovar la via da guaud Valzeina-Engi (Valzeina, Trimmis e Says) ha la regenza approvà totalmain var 450'000 francs.

Projects da vias
- Per lavurs vi da la punt da la val da Castiel e vi dal nov access da la via da Cunter en il Partenz ha la regenza approvà totalmain var dus milliuns francs.

chanzlia chantunala dal Grischun

Gremi: regenza
Funtauna: rg chanzlia chantunala dal Grischun