Ils furniturs d'electricitad vegnan a cumprovar la cumposiziun e la derivanza da "lur" electricitad a partir da l'onn 2005. L'infurmaziun cumpiglia las parts procentualas dals purtaders d'energia duvrads (forza idraulica, energia solara, energia nucleara ed auters) sco er la derivanza da l'electricitad (Svizra, exteriur). Per quai sto vegnir adattada l'ordinaziun d'energia. La regenza grischuna sustegna l'uschenumnada "caracterisaziun da l'electricitad". Quella stgaffescha transparenza per la consumenta finala e per il consument final e sustegna la finamira politica dal chantun Grischun da promover la forza idraulica.

In'ulteriura midada da l'ordinaziun d'energia concerna l'indemnisaziun dal surpli d'energia. Producentas e producents d'energia privats han fin ussa pudì partir dal fatg che lur surpli d'energia saja vegnì surpiglià e pajà garantidamain da producents d'energia publics. Quests custs supplementars duain ussa vegnir adossads a la consumenta finala ed al consument final. La regenza beneventescha er questa direcziun da la nova ordinaziun d'energia. Spezialmain en las regiuns da muntogna vegnian distgargiadas uschia singulas ovras electricas da custs supplementars, scriva ella en sia posiziun a l'uffizi federal d'energia.

Stabiliments da tanc: la confederaziun accentuescha anc pli fitg l'atgna responsabladad
La confederaziun vul reducir ad in minimum - per motivs da spargn - sia surveglianza suprema en il sectur dal deposit, dal transport e da la svieuta d'uschenumnads "liquids privlus per las auas". Per quai sto vegnir revedida la lescha federala davart la protecziun da las auas, adattada l'ordinaziun federala davart la protecziun da las auas ed abolida l'ordinaziun federala davart la protecziun da las auas cunter liquids privlus per las auas. Responsablas e responsabels ch'ils stabiliments da tanc adempleschian en l'avegnir las pretensiuns legalas fissan uschia en emprima lingia lur possessuras u lur possessurs e las autoritads communalas cumpetentas per conceder ina permissiun da construcziun.

La regenza grischuna è da princip d'accord cun ina part da las midadas previsas. Però va la reducziun da l'obligaziun da dumandar ina permissiun per stabiliments da tanc en tscherts secturs memia lunsch. La protecziun - spezialmain da l'aua sutterrana - sto vinavant esser garantida. Ultra da quai sto l'execuziun da la nova regulaziun esser la medema en tut ils chantuns, scriva la regenza en sia consultaziun a l'uffizi federal d'ambient, guaud e cuntrada.

Ils uffizis d'abitants han libertads pli grondas tar las taxas
Ils uffizis d'abitants da las vischnancas pon applitgar tariffas pli autas per lur prestaziuns da servetsch a partir dal 1. d'october. La regenza ha adattà las disposiziuns executivas correspundentas tar la lescha davart il domicil dals Svizzers. Las tariffas actualas valan gia dapi bunamain 20 onns.

Otg leschas revedidas entran en vigur
Senza ch'i saja vegnì profità dal referendum è la fin da fanadur 2004 scadì il termin da referendum per ina entira retscha da relaschs revedids. La regenza als ha ussa mess en vigur:

per ils 15 d'avust:
- la revisiun parziala da la lescha davart la scol'auta professiunala da pedagogia,
- la revisiun parziala da la lescha da scolina,
- la revisiun parziala da la lescha da scola,
- la revisiun parziala da la lescha davart las scolas medias,
- la revisiun parziala da la lescha chantunala davart la furmaziun professiunala;

per il 1. da settember:
- la revisiun parziala da la lescha davart l'agid en cas da catastrofas e
- la revisiun parziala da la lescha chantunala da chatscha;

per il 1. da schaner 2005:
- la revisiun parziala da la lescha davart la banca chantunala grischuna.

Consultaziuns a la confederaziun
- Uffizi federal d'energia, "ordinaziun davart l'energia nucleara": La regenza dal Grischun sa stabilescha sin il puntg da vista ch'i na possian vegnir chattads en il chantun Grischun er en il proxim futur nagins lieus ch'èn adattads per la construcziun d'ina ovra nucleara. Ella beneventescha dentant expressivamain l'obligaziun da dumandar ina permissiun per tschertas examinaziuns scientificas da terra - sche quella è fixada en il dretg chantunal - schebain ch'ellas vegnan cumprovadas da l'ordinaziun davart l'energia nucleara sco betg suttamessas a l'obligaziun da dumandar ina permissiun.

Da vischnancas e regiuns
- Sagogn / Schluein: La regenza ha approvà cun cundiziuns la planisaziun d'utilisaziun per realisar in nov stabiliment da golf. Ultra da quai è vegnì constatà ch'il project per ina plazza da golf possia vegnir construì e manà en moda ecologica. Ils recurs da las uniuns per l'ambient WWF, pro natura e fundaziun svizra per la protecziun da la cuntrada FP sco er da l'associaziun svizra per la protecziun dals utschels ASPU èn vegnids refusads.
- Igis / Landquart: La situaziun da las pedunas e dals peduns en il sectur da la cruschada "Calanda" duai vegnir meglierada. Per quest project ha la regenza deliberà ina contribuziun chantunala da ca. 38'000 francs.
- Vuorz: La regenza ha approvà la constituziun communala revedida. Quella na prevesa da nov tranter auter nagin termin da carenza da trais mais pli tar il dretg da votar e d'eleger e regla er da nov las cumpetenzas finanzialas da la suprastanza communala.
- Morissen / Rueun: Per la sanaziun e per l'engrondiment dals provediments d'aua correspundents ha la regenza garantì a las vischnancas ina contribuziun chantunala da totalmain ca. 520'000 francs.

Contribuziuns chantunalas a differentas instituziuns
- Protecziun cunter la crudada da crappa a Li Geri / Campocologno: La regenza ha approvà ca. 90'000 francs per prolungar il rempar existent per var 250 meters.
- Avertura dal guaud a Sass-Palazi / San Vittore: Per quest project èn vegnids approvads ca. 900'000 francs. Il project per l'avertura dal guaud è ina part da l'avertura generala da la vischnanca da la vart dretga da la val.
- SELVA: La federaziun forestala dal Grischun "SELVA" survegn per sias differentas incumbensas l'onn 2004 ina contribuziun chantunala da 60'000 francs, tranter auter per realisar projects da clav en il sectur da l'energia da lain.
- Contribuziuns culturalas: L'associaziun da las ludotecas dal Grischun e l'archiv cultural dal Grischun survegnan ina contribuziun chantunala da totalmain ca. 43'000 francs per l'onn 2004.

Chaussas persunalas
- Il procuratur per giuvenils Corsin Capaul è vegnì elegì sco nov procuratur public. El cumenza sia plazza il cumenzament da matg 2005.
- Morena Ficicchia è vegnida elegida sco cussegliadra da scola e d'educaziun tar il servetsch psicologic da scola da l'uffizi per la scola populara ed il sport per il settember 2004.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun