da Klaus Huber, president da la regenza

Mintga mais van a perder plazzas da lavur en il chantun Grischun tras quai che manaschis vegnan serrads u plazzas da lavur spustadas. Tras ina politica activa per promover l'economia duai quest svilup vegnir cumbattì. Per quest intent stuain nus cunzunt avair quità da l'economia indigena e la dar bunas cundiziuns da basa. Ultra da quai èn dentant er indispensablas novas plazzas da lavur progressivas. Il chantun sez na po betg crear questas plazzas da lavur. Latiers dovri interpresas che investeschan en il chantun. La finamira da la promoziun chantunala da l'economia è da segirar las plazzas da lavur existentas e da crear novas.

Durant ils ultims onns ha il chantun rinforzà las activitads da la promoziun da l'economia e creà in marketing dal lieu. Igl è sa mussà che las pussaivladads resp. ils instruments da la promoziun da l'economia na bastan betg e ch'els ston vegnir meglierads. Perquai è vegnida revedida la lescha per promover l'economia publica da l'onn 1990 e vegnida relaschada la nova lescha per promover il svilup economic en il chantun Grischun (LSE).

La nova LSE è ina lescha moderna ed agila. Quest project vul optimar l'instrument da la promoziun da l'economia. Ils puncts centrals da la revisiun da la lescha pon vegnir descrits sco suonda:
- sustegnair il svilup e la creaziun d'interpresas pitschnas e mesaunas cun emprests da daners;
- promover l'hotellaria er independentamain da la promoziun tras la societad svizra da credit d'hotel;
- promover las tecnologias d'infurmaziun e da communicaziun cun emprests da daners u cun contribuziuns;
- sustegnair las organisaziuns regiunalas per augmentar la cumpetitivitad da las regiuns;
- sustegnair stabiliments da sport d'impurtanza chantunala;
- sustegnair instituziuns da perscrutaziun, spezialmain talas cun in'attracziun internaziunala.
En emprima lingia duain vegnir sustegnids innovaziuns e projects progressivs. Il turissem da stad ed il turissem d'enviern na duain betg concurrenzar in l'auter. Anzi i va per plazzas da lavur, creaziun da valurs, innovaziuns ed investiziuns en l'avegnir, tant la stad sco er l'enviern.

Tras la lescha vegnan er creadas meglras basas legalas per la statistica, per il marketing dal lieu e per la participaziun a programs d'organisaziuns internaziunalas (interreg). Ultra da quai cuntegna la lescha la basa per sustegnair las mesiras per la politica regiunala da la confederaziun.

La nova lescha metta mo a disposiziun l'instrumentari da promoziun. Ils accents strategics per il svilup economic èn mintgamai cuntegnids en il program da la regenza. Per ils onns 2005 fin 2008 èsi per exempel previs d'intensivar la politica da domiciliaziun, da promover l'innovaziun ed il transfer da savida, da promover l'innovaziun en il turissem sco er da promover cooperaziuns e structuras effizientas. Il cussegl grond approvescha ils accents e dirigia ils meds finanzials tras ils preventivs annuals.

Ils 26 da settember 2004 votain nus davart la nova lescha per promover il svilup economic en il chantun Grischun (LSE). Il cussegl grond ha acceptà la nova lescha per promover il svilup economic en il chantun Grischun cun 89 cunter 15 vuschs. La nova lescha è ina contribuziun al svilup economic positiv dal chantun Grischun.

Gremi: departament da l'intern e da l'economia publica
Funtauna: rg departament da l'intern e da l'economia publica