La regenza vegn a suttametter al cussegl grond en la sessiun da zercladur 2005 in sboz per la revisiun da la lescha davart il diever dals dretgs politics en il chantun Grischun. La cumissiun permanenta per economia, taxas e politica da stadi dal cussegl grond ha tractà preliminarmain la missiva correspundenta da la regenza en sia sesida dals 2 da matg 2005 per mauns dal cussegl grond. Er presidenta da la regenza Eveline Widmer-Schlumpf, chancelier Claudio Riesen e vicechancelier Walter Frizzoni èn stads preschents a quella sesida.
La raschun per la revisiun totala intenziunada è la nova constituziun dal chantun Grischun ch'è entrada en vigur il 1. da schaner 2004. In'analisa da la chanzlia chantunala ha mussà che - pervi da la nova constituziun - exista in basegn d'agir per il sectur dals dretgs politics ch'è grond pertutgant il cuntegn e ch'è relativamain urgent pertutgant il termin.

Tar diversas disposiziuns dal project èn vegnidas formuladas propostas da maioritad e da minoritad. En moda spezialmain controversa è vegnida discutada la finanziaziun da las partidas. Ina minoritad da la cumissiun pretenda qua da desister totalmain dal pajament d'ina contribuziun finanziala a las partidas politicas. Perencunter vul in'autra proposta pertutgant la finanziaziun da las partidas reducir la contribuziun finanziala a las partidas ch'è previsa en la missiva da la regenza. In'ulteriura proposta da minoritad concerna la reducziun dal quorum necessari da votantas e da votants per inoltrar ina iniziativa communala. La missiva da la regenza è la finala vegnida deliberada per mauns dal cussegl grond.
Persuna che dat infurmaziuns: president da la cumissiun Ernst Nigg, tel. 081 307 36 36

Gremi: cumissiun per economia, taxas e politica da stadi
Gremi: rg cumissiun per economia, taxas e politica da stadi