In'emprima etappa dal project da model per ina politica d'aglomeraziun ch'è vegnì lantschà per l'aglomeraziun da Cuira il cumenzament da l'onn 2003 è terminada. La regenza ha prendì enconuschientscha da las lavurs fatgas fin ussa e planisadas en connex cun il project da model e da las ulteriuras lavurs planisadas. Cun quest project sa participescha l'aglomeraziun da Cuira vi dal project "politica d'aglomeraziun da la confederaziun". La finamira surordinada dal project è da rinforzar la collavuraziun surregiunala. Il perimeter dal project tanscha da Sargans a Tusaun sco er en las vals lateralas fin a Glion, a Lai, ad Arosa ed a Küblis. En il center da las activitads d'enfin uss steva l'elavuraziun da mesiras d'approfundaziun en il sectur dal traffic. En quest connex era prioritara la realisaziun d'in consorzi tariffar. Per realisar quest project fan ins quint cun in agid finanzial da la confederaziun.

La maturitad professiunala, direcziun commerzi, dal center da furmaziun commerziala a Lucerna vegn renconuschida
Perquai che la maturitad professiunala, direcziun commerzi, vegn purschida en Grischun mo sco studi a temp cumplain e betg sco studi cumplementar a la professiun, renconuscha la regenza il studi correspundent dal center da furmaziun commerziala a Lucerna. A studentas ed a students che vulan far quel studi cumplementar a la professiun a Lucerna vegnan pajadas contribuziuns.

Scumpartì la dieschma d'alcohol 2004
La regenza ha scumpartì la dieschma d'alcohol da var 754'515.80 francs per l'onn da gestiun 2004. Quels daners vegnan duvrads per projects da prevenziun, per custs da tractament, per tractaments posteriurs sco er per projects da perscrutaziun e da furmaziun. Tenor la "lescha federala davart las bavrondas destilladas" sto vegnir duvrada la part dals chantuns dal retgav net da l'administraziun federala d'alcohol per il cumbat cunter l'alcoholissem en ses motivs e sias consequenzas sco er per il cumbat cunter l'abus da drogas, da narcotics e da medicaments.

Da vischnancas e regiuns
- Igis: La regenza approvescha plirs plans da zonas e plans generals da furmaziun sco er in plan general d'avertura.
- Leggia: La nova constituziun communala vegn approvada.
- Purtagn: La regenza approvescha la revisiun parziala da la constituziun communala.
- Preaz: La regenza deliberescha ina contribuziun da maximalmain 204'750 francs als custs da construcziun e da sanaziun da diversas vias champestras.
- Versomi: La revisiun parziala da la constituziun communala vegn approvada.

Contribuziuns chantunalas a differentas instituziuns
- Scola professiunala a Cuira: La regenza ha approvà ina contribuziun da maximalmain 1'040'500 francs per l'engrondiment da la scola professiunala a Cuira. Quai correspunda a 50 pertschient dals custs imputabels. Il project prevesa la construcziun da plirs locals da classa e da gruppa, d'in local da material sco er l'installaziun d'in lift.
- Club da bob da Schlarigna La regenza ha concedì al club da bob Celerina/Schlarigna ina contribuziun da maximalmain 7500 francs or dal fond da sport per cumprar in bob da cursa da quatter.

Projects da vias
La regenza ha approvà totalmain 1'160'000 francs per construir e per sanar divers trajects da via:
- A 13: Giuvaulta - Panaduz

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun