La regenza ha deliberà la revisiun parziala da la lescha da taglia. Il cussegl grond vegn a tractar quella en la sessiun da december. La revisiun cumpiglia per l'ina ina adattaziun da la lescha chantunala da taglia a las disposiziuns da dretg fiscal da la lescha davart la fusiun e per l'autra in levgiament da l'imposiziun economica dubla.

Cun la lescha davart la fusiun èn vegnidas formuladas las prescripziuns davart la restructuraziun da la lescha federala davart la taglia federala directa (LTFD) e da la lescha d'armonisaziun da taglia (LATD) en moda pli averta e pli moderna ed adattadas al dretg civil midà. En quest connex na sa tractavi betg da renunziar d'imponer taglia sin ils gudogns d'interpresa en connex cun las restructuraziuns. L'imposiziun na duai dentant betg vegnir fatga il mument da la restructuraziun; ella duai vegnir sistida fin a la realisaziun effectiva posteriura da las reservas zuppadas (spezialmain la vendita). Uschia han ins vulì evitar en spezial ch'il dretg fiscal impedeschia u rendia schizunt nunpussaivlas las pussaivladads concepziunalas tenor il dretg civil. Las disposiziuns da dretg fiscal davart las restructuraziuns (fusiun, partiziun e transfurmaziun d'interpresas) èn vegnidas unifitgadas per l'entira Svizra. Las regulaziuns da la LATD e da la LTFD èn praticamain identicas e laschan al legislatur chantunal mo in spazi concepziunal fitg restrenschì. Las disposiziuns da la LTFD èn entradas en vigur il 1. da fanadur 2004 cun la lescha davart la fusiun. Fin a l'adattaziun da la lescha chantunala da taglia valan per la confederaziun e per il chantun per part regulaziuns differentas. Uschia daventan cumplitgadas restructuraziuns ch'èn raschunaivlas dal puntg da vista da l'economia da manaschi, ils custs administrativs creschan e la segirezza giuridica patescha. Pervi da quai duai l'adattaziun a la lescha davart la fusiun vegnir fatga gia per il cumenzament da l'onn che vegn.

Ils gudogns d'ina persuna giuridica vegnan l'emprim suttamess a la taglia sin il gudogn. Sche quests gudogns vegnan distribuids, èn els suttamess a la taglia sin las entradas da l'acziunaria u da l'acziunari (persuna natirala). Questa imposiziun dubla dals medems gudogns vegn numnada imposiziun economica dubla. Divers chantuns han introducì in levgiament da questa imposiziun dubla. Per betg arrivar en dischavantatg tar la cumpetitivitad interchantunala duai il chantun Grischun er levgiar l'imposiziun economica dubla a partir d'ina participaziun da diesch pertschient. La revisiun parziala chaschuna entradas pli pitschnas da var 5 milliuns francs.

Gremi: regenza
Funtauna: rg chanzlia chantunala dal Grischun