La regenza grischuna ha approvà la cunvegna da fusiun da las vischnancas da Spleia e da Medel (Valragn) e dumonda il cussegl grond da metter en vigur la fusiun da quellas duas vischnancas per il 1. da schaner 2006. Quai resorta da la missiva correspundenta da la regenza al parlament. Il cussegl grond vegn a tractar il project il december. Suenter il conclus da fusiun da las duas vischnancas dals 26 d'avust 2005 vegn la nova vischnanca da Spleia classifitgada en la gruppa da forza finanziala trais per ils onns 2006 e 2007. La regenza motivescha questa classificaziun ch'ella ha fatg uschia, che la situaziun finanziala da la nova vischnanca na duaja betg vegnir engrevgiada supplementarmain da la fusiun.

Propostas tar la revisiun da l'ordinaziun davart la protecziun cunter canera
Actualmain na vul la regenza nagin augment da las pretensiuns a fanestras ch'absorbeschan il tun. Quai scriva ella a l'uffizi federal d'ambient, guaud e cuntrada (UFAGC) en sia consultaziun tar la revisiun da las agiuntas 1,2 e 7 sco er tar l'art. 17 da l'ordinaziun davart la protecziun cunter canera (OPC). Ina midada da las reglas da gieu n'è betg raschunaivla or dal puntg da vista da la regenza, perquai ch'ins è en blers chantuns gist londervi da far sanaziuns cunter la canera. Ultra da quai refusa la regenza il project da betg pli prescriver la procedura per calcular las valurs da mesiraziun en la OPC, mabain da laschar fixar tala dal UFAGC. Primo è la credibladad da las valurs da mesiraziun en privel, secundo vegnan uschia difficultadas cumparegliaziuns cun resultats da mesiraziuns da pli baud e terzo chaschunan talas midadas gronds custs supplementars. Perencunter beneventescha la regenza che la canera dals fatgs da tir civil duai en il futur vegnir giuditgada tenor las categorias d'arma e betg pli tenor la distanza da tir. Questa regulaziun stgaffescha relaziuns cleras e precisas per giuditgar la canera da tir che deriva d'armas da caliber pitschen.

La regenza fa propostas per la "signalisaziun dal traffic betg motorisà"
La regenza grischuna fa frunt a la nova definiziun da rutas alpinas sco sendas da viandar alpinas, sco quai che la confederaziun propona en il rom da la "signalisaziun dal traffic betg motorisà". Quai resulta da la consultaziun correspundenta a l'uffizi federal da vias. Da definir rutas alpinas generalmain sco sendas da viandar alpinas n'è - or da l'optica da la regenza - betg ina buna schliaziun. Pertge che la nova designaziun po chaschunar confusiuns tar l'utilisadra u tar l'utilisader, perquai che lunsch or betg tut las rutas en las muntognas n'èn sendas da viandar en il senn pli stretg. Plinavant approvescha la regenza la renunzia planisada dals mussavias brins per sendas da viandar culturalas e tematicas. Il mussavia brin sto esser reservà per rinviar ad in bain cultural ordaifer la ruta sco tala. Ultra da quai è la regenza cunter la normaziun da tablas d'infurmaziun. Tut tenor ils basegns sto ina signalisaziun chantunala divergenta vinavant esser pussaivla. Perencunter beneventescha la regenza ina normaziun en il sectur da las surfatschas da sponsoring e da reclama.

Las dumondas da garanzias commerzialas duain restar ina incumbensa federala
En sia consultaziun tar la lescha davart l'examinaziun ed il rinforzament da las dumondas da garanzias commerzialas punctuescha la regenza grischuna che las dumondas da garanzias commerzialas duajan er en il futur esser ina chaussa federala. Correspundentamain beneventescha ella questa lescha sco in instrument da promoziun cunvegnent en il sectur da la procuraziun da chapital ester per las interpresas pitschnas u mesaunas (IPM). Per augmentar l'effizienza e la professiunalitad sustegna ella er l'intenziun da reducir il dumber da las associaziuns da garanzia en Svizra.

Da vischnancas e regiuns
- Lantsch: La nova constituziun communala vegn approvada.
- Sarn: La regenza approvescha la revisiun da la lescha communala da taglia.

Contribuziuns chantunalas a differentas instituziuns
- Lottaria naziunala: La regenza ha approvà circa 400'000 francs da la lottaria naziunala per intents culturals: En quest connex vegnan resguardadas 72 instituziuns.
- Corporaziun regiunala Val Müstair: Al project "biosfera Val Müstair - parc naziunal" vegn garantida da la regenza ina contribuziun da 160'000 francs per la perioda da 2005 fin 2007.

Projects da vias
La regenza ha approvà 410'000 francs per sanar la via sursilvana tranter Mustér e Sedrun.

Persunal
Dr. med. Martin Mani, che viva ad Ennenda, è vegnì elegì da la regenza sco medi chantunal.

Chanzlia chantunala dal Grischun

Gremi: regenza
Funtauna: rg chanzlia chantunala dal Grischun