Cun la missiva davart la revisiun parziala da la lescha da vischnancas dal chantun Grischun e davart la legislaziun da la gulivaziun da finanzas preschenta la regenza grischuna al cussegl grond instruments directivs per la concepziun futura da la politica da vischnancas. Ils dus projects furman a medem temp l'emprima etappa da la realisaziun d'in project da structura che va pli lunsch e che tutga tar il program da la regenza 2005 - 2008. Quel collia ina refurma da las structuras territorialas cun ina nova concepziun da la repartiziun da las incumbensas e da la gulivaziun da finanzas. Las fatschentas ch'èn impurtantas per l'organisaziun da la convivenza en il Grischun vegnan tractadas dal parlament en la sessiun da december.

En la lescha da vischnancas dal chantun Grischun vegnan actualisadas las disposiziuns davart la collavuraziun intercommunala e quellas davart la fusiun da vischnancas. En connex cun la fusiun da vischnancas vegnan fatgas cumplettaziuns en ils secturs da la promoziun e dal sforz. Tar la promoziun vegnan las pussaivladads gia existentas sco la contribuziun da promoziun, la garanzia dal possess actual e las contribuziuns da gulivaziun definidas en moda pli vasta. Plinavant è vegnì extendì l'artitgel concernent il sforz. Uschia survegn il cussegl grond la pussaivladad da pudair sfurzar tras fusiuns, sche la cooperaziun d'ina u da pliras vischnancas è indispensabla per ch'ina nova vischnanca fusiunada funcziuneschia. Questa revisiun parziala sa basa sin las prescripziuns da la nova constituziun chantunala davart ils secturs "vischnancas e collavuraziun intercommunala" respectivamain "circuls, districts e corporaziuns regiunalas". La lescha da vischnancas dal chantun Grischun stgaffescha pia supplementarmain la basa per la reorganisaziun da las corporaziuns regiunalas. La lescha da vischnancas dal chantun Grischun ch'è valaivla oz datescha da l'onn 1974.

La voluntad da fusiunar vegn remunerada meglier en l'avegnir
Cun la nova lescha davart la gulivaziun da finanzas intercommunala e cun l'ordinaziun executiva respectiva vul la regenza ultra da quai rinforzar ils impuls per fusiuns da vischnancas ed eliminar impediments existents. La regenza propona in nov model per la gulivaziun da la forza fiscala ed ina nova regulaziun en connex cun la resalva persunala per contribuziuns ad ovras publicas. Il nov model per la gulivaziun da la forza fiscala prevesa da garantir a tut las vischnancas ina gulivaziun minimala da la forza fiscala; questa contribuziun da basa importa independentamain dal dumber d'abitantas e d'abitants 55 fin 60 pertschient da la media chantunala. Per vischnancas deblas da finanzas che applitgeschan in pe da taglia d'almain 120 pertschient po la forza fiscala relativa vegnir gulivada supplementarmain a 75 fin 100 pertschient da la media chantunala. Questa gulivaziun supplementara vegn fatga mo per las emprimas resp. per ils emprims 300 abitants. Vischnancas cun almain 300 abitantas ed abitants profiteschan cumplainamian da questa contribuziun supplementara, talas cun main che 300 abitantas ed abitants perencunter survegnan da nov ina contribuziun reducida. Per vischnancas fusiunadas vegn ultra da quai schluccada la limita d'abitantas e d'abitants da 300 persunas per in termin transitori da 15 onns. Da nov na duai la resalva persunala per contribuziuns ad ovras publicas betg pli esser dependenta dal dumber d'abitantas e d'abitants (fin ussa 400 francs per persuna), mabain importar 100'000 francs per ovra. Uschia pon vegnir promovidas ovras surcommunalas cun cleras intenziuns ed en moda pli intensiva.

Documentaziun per l'orientaziun a las medias

Gremi: regenza
Funtauna: rg chanzlia chantunala dal Grischun